Kawng tha kan mamawh; a enkawltu tha pawh kan mamawh
Fur ruahtui tla vangin hmun hrang hrangah inkalpawhna kawngpui a chhe nasa hle mai a, lirthei tana zawh ngam loh khawpa chhia pawh a awm nual. Enkawltu leh viltu nei lo ang maia kan kawngpuite a awm hi a pawi a, ngaihsak an va ngai em.
Lunglei atanga Tlabung panna kawngpui, National Highway 302 chhe zual lai thawm tha tura a mawhphurtute nawr nan Commercial Vehicle Joint Action Committee : Tlabung chuan nilaini atang khan Tlabung atanga lirthei chhuak tur leh lut tur an dang tan a; hetih lai hian Mamit panna kawngpui chhe lutuk chungchangah pawh vawiin thlenga thu lawmawm hriat tur a awm loh chuan pawl hrang hrang inzawmkhawmin lirthei kal theih loh tura dan an tum thu an sawi bawk.
Tlawmngai pawl hrang hrangin lungawi lohna an lantir thin hi a thatna lai a awm a, nawrtu awm lova sorkar a awm reng hi chuan thaa inngaihna an nei mai ang tih a hlauhawm thin. Mahse, nawr kal reng ngai nih erawh a hlauhawm tih kan hriat tel a ngai a, sorkar hian hmalakna a neih thiam thuai thuai a tul hle. Chutiang tur atana mipui hnena inzuar, kan aiawha hnathawh kawr ha tura thlanchhuahte an ni si a.
Kawngpui chhiate hian ngaihtuahtu an mamawh a, a tuartu chu mipui zel kan nih avangin sorkar hian a enkawl kawngah tute hna pawh nise hma la chak se la, harsatna nasa zawk a thlen hmaa chinfel dan zawng zel rawh se.