In chhungkhura tharum thawhna leh hleilenna a tam, tia sawiselna leh boycott hial tura ngenna karah Alia Bhat channa, ‘Darlings’ chu Netflix-ah ni thum chungin darkar maktaduai 10 chuang view hman niin, a hit hle.
Actor lar chak tak Shefali Shah nena an inlanna, ‘Darlings’ hi August 5 khan Netflix kaltlanga tihchhuah tan niin, pasal kut thlak ching tak laka phubalakna hmuhnawm tak a ni.
OTT platform-ah hian ‘Darlings’ hian hlut a hlawh a, record duhawm tak a nei chho zel tura ngaih niin, Director Jasmeet K Reen tan paw’n lawmna tur a tam.
Top 10 Trending film-ah lang chho tawhin, English tawng hmang lo film-in opening hit ber a neih a lo ni lehzel bawk nen, ni thum chhung leka view hours maktaduai 10 chuang a awm hman hi ‘Darlings’ hlawhtlinna ropui tak a tih theih awm e.