Nitish Kumar-a kaihhruai, Mahagathbandhan sorkar chu Bihar Legislative Assembly-ah August 24-ah rintawk a hlawh leh hlawk loh buk a ni dawn.
August 24-ah hian assembly session neiha sorkar buk tura sawi awm chu Speaker Vijay Kumar Sinha a bân duh loh avangin sawn a ni dawn tih sawi a awm a, tangrual sorkar thar hian a lakah no-confidence motion put luh an tum tih sawi a awm hman bawk.
Sinha chuan, “He nihna ka la chelh chhung hi chuan pawn lam miin thuchhuah an nei thiang lo,” tiin thuthar lakhawmtute hnenah a sawi.
“Chief minister-in lehkha a thawn a, assembly session ko turin a ti a. Secretary-in a kimchangin an nei vek a, file kan dawn hunah kan la hre chiang ang chu,” a ti bawk.
Grand Alliance-a MLA eng emaw zat chuan an hming ziah hnanin assembly secretariat hnenah Nilaini tlai khan lehkha an thehlut a, hei hi chief minister atana Kumar-a leh a deputy atan RJD hruaitu, Tejashwi Yadav-a lak luh an nih hnu lawkah a ni.
Mahagathbandhan, Grand Alliance an tih hian assembly-ah member 164 an nei mek a, BJP-in 77 an nei thung.
Tar lan tawh thin angin Kumar-a hi Nilaini khan a vawi riat nan Bihar chief minister atan Raj Bhavan-a inkhawm mawlmang taka neihah lak luh a ni a, a hma ni chiah khan a kaihhruai, Janata Dal-United (JD-U) chuan BJP kaihhruai National Democratic Alliance (NDA) chu chhuahsanin Lalu Prasad Yadav-a kaihhruai, Rashtriya Janata Dal (RJD) nen tangrualin Mahagathbandhan sorkar an din a ni.
Cabinet pawh tihlen thuai a nih rin a ni a, minister atan hian JD(U), RJD, Congress leh an thawhpui party dang hruaitute an tel ang.Bihar-a mahagathbandhan nihna
Bihar-a party tangrual, Mahagathbandhan, Grand Alliance tia an sawi bawk hi political party eng emaw zat tangrualten kum 2015 assembly inthlan hmaa an din kha a ni.
Party tangrual hi Rashtriya Janata Dal (RJD) kaihhruai ni deuh berin Janata Dal (United), Indian National Congress (INC), leh Left party zingah Communist Party of India (CPI), Communist Party of India (Marxist–Leninist) Liberation-CPIML (Liberation) leh Communist Party of India (Marxist) (CPIM) an tel.
An din tirhah hian JD(U) chief Kumar chu chief minister atana an candidate niin Yadav chu deputy chief minister tura an tih a ni a, an tlin hnua sorkar an siam hnu, kum 2017 khan Kumar hi chhuakin BJP leh party dangte nen sorkar an siam a, Mahagathbandhan hi eptu-ah an thu.
Kum 2020 inthlan hnuah pawh Kumar-a bawk chief minister a ni leh a; mahse, Thawhlehni khan BJP a thawhpuina titawpin Mahagathbandhan-ah a let leh a, an din tirha an ruahman angin sorkarna a siam leh a ni.