Sri Lankan president hlui, Gotabaya Rajapaksa chuan Ningani khan Singapore a chhuahsan a, khawpui pakhat, ram khat ni bawka immigration office chuan a social visit pass a tawp hnuah an ram a chhuahsan niin an sawi.
“Immigration & Checkpoints Authority (ICA) chuan Pu Gotabaya Rajapaksa-a’n Singapore chu August 11, 2022 hian a chhuahsan tih an nemnghet,” tiin office chuan AFP zawhna a chhang.
Rajapaksa hian khawi lam nge a pan dawn tih erawh a sawi lo va; mahse, Thai foreign ministry chuan Nilaini khan Thailand-a awm theih dan a dap tih a sawi a, Colombo khawpuiah pawh hetiang thu bawk hi a lengvak nsa bawk.
Rajapaksa hian July 13 khan an ram chhuahsanin Maldives a pan a, Singapore a pan leh a. Heta tang hian an ram eibar dinhmun hniam lutuk avanga mipuiin bâng tura rei tak an nawrna tihlawhtlingin a bânna a thehlut.
Tar lan tawh angin nikum kum tawp atanga ei tur, tuialhthei, damdawi leh ni tin mamawh dang an tlakchham nasat avanga a kaihhruai sorkar laka an ram mipui thinrim inhawrkhawm chuan thla hmasa khan a chenna in an luhchilh.
“Singapore visa a neih chu Ningani khan a tawp,” tiin Colombo-a Rajapaksa chungchang hria chuan AFP a hrilh.
“Cham zui a dil a; mahse, Nilaini tuk thleng kha chuan thu lawmawm a dawng lo,” a ti bawk.
Rajapaksa hian rei vak lo cham turin Thailand pan a tum niin a sawi a, Singapore-ah pawh visa thar nen kir leh a tum.
Thai foreign ministry pawhin Colombo atangin hruaitu paih thlak tak, kum 73 miin Thailand a tlawh duh tih a dawng tih a sawi a, politics avanga inhumhimna erawh a dil lo.
“President hluiin Thailand a luh dilna hi Sri Lanka sorkar atangin kan dawng,” tiin ministry thupuangtu, Tanee Sangrat chuan a sawi.
“A awm zawk dawn chauh va, zin zel a tum a. Politic thil avanga inhumhimna erawh a dil lo,” a ti.
Singapore-a Sri Lankan lutte hi ni 30 zel awm phalsak an ni a; mahse, Singapore thuneitute hian Rajapaksa hi chawlhkar hnih chauh a awm an phalsak phawt a, chawlhkar hnih dang a pawh seisak.
Rajapaksa lamtang thenkhat chuan amah leh a sorkar duh lohna lantirna boruak a reh deuh tak avangin haw leh mai a tum niin a sawi a; mahse, amah thlaktu, Ranil Wickremesinghe chuan a haw hma lutuk hi a la remtihsak lo va, a himna atan a la hnar rih nia sawi a ni.