Assam Rifles leh Nagaland Police tangho chuan Zunheboto district-a Hosephu-ah a ruka NSCN-K (Khango) hel pawl chenna leh an bungrua eng emaw zat an hai chhuak.
Helaiah hian a ruka an awm khawmna thin hmun (camp) a awm tih an dawn chu bawhzuiin venhim hna thawktute hian an hai a, an man chhuak.
“Camp hi tihchhiat vek a ni a, hal ral vek a ni,” tiin thuchhuah an siamah an tar lang.
Camp-ah hian helho bungrua chi hrang hrang - uniform, ration leh puan inte pawh an hmu tel tih an sawi bawk.
An bungrua an hai chhuahte hi Zunheboto district-a Aghunato Police Station-ah police kutah dah a ni.
Hetih lai hian Assam Rifles leh Nagaland Police ten beihpui an thlak dunnaah hlawhtlinna lian tak changin NNC GDRN (NA) hel pawla mi pakhat chu Signal Angami, Dimapur district-ah an man bawk.
An mi man hnen atang hian .32mm pistol leh a mu thahnem tak an man tel nghe nghe.