Aizawl: Melriat Village Council leh tlawmngai pawlte chuan August thla ral hma ngeia 132 KV Power Sub Station atanga kawlphetha pe turin sorkar an phut.
Nilaini zan khan Melriat Village Council, YMA, MUP leh MHIP hruaitute chu an thukhawm a, December 14, 2016-a hawn, 132 KV Power Sub Station atanga kawlphetha an dawn loh chungchang sawihoin resolution an siam.
Melriat khawtlangin ram a pek avangin power sub station hi bun a nih thu sawiin, heta tanga kawlphetha pe turin sorkar an lo nawr fo tawh a, sorkar hotu lam pawhin pek an nih tur thu an lo tawng tiam tawh thin tih an sawi a, hetih laia tun thlenga an la dawng lo chu Melriat mipuiin thinrimthlak an tih thu an sawi.
August thla ral hma ngeia he sub station atanga kawlphetha pe turin sorkar an phut a, an hunbi tiam chhunga an thil phut tihhlawhtlin a nih loh chuan power sub station-ah hian eng pawh thleng se, sorkar leh department mawh a nih dawn thu an sawi.
Melriat VC leh tlawmngai pawlte hian an thil phut leh an resolution chu nimin khan power & electricity minister hnenah an thehlut bawk a ni.