Aizawl: Social Welfare Minister Dr. K. Beichhua chuan nimin khan Noaotla khuaa Eklavya Model Residential School building sak mekte a tlawh.
Noaotla khua VC Court House-a inkhawmna an buatsaihah Dr. K. Beichhua chuan thu sawiin, mahni tanghma haina, thawk lova ei tumna hian kan ram a tichhe mek tih a sawi a. “Politics thil tum chu mipui vantlangin kan intawm theih thil kawngpui te, damdawi in te, zirna in te siam a ni. Chutiang nei tur chuan sorkar pawhin harsatna hrang hrang karah theihtawp chhuahin hma a la mek zel a ni,” a ti.
Dr. K Beichhua chuan EMRS School hawn a nih hun chuan Noaotla leh a chhehvel khuaten Delhi naupang zirlai ang, CBSE course an zir thei dawn nia sawiin, hetianga hmasawnna hi hmasawnna dik politician thalai zawkten an buaipui mek a nih thu a sawi.
Social welfare minister hian Noaotla EMRS campus bula din tur, Centre of Excellence-in sports hmunhma tur a tlawh bawk a. Noaotla lama hun a hman zawhah Siahatlah, Tisopi road-a Siaha Youth Centre a tlawh nghal bawk.
Dr K Beichhua hi MADC Chairman N Viakhu, MADC EM (Sports) St Vanlalmalsawmliana, Social Welfare Secretary Arun Mishra, Director Zodingpuii leh sorkar mi pawimawh dangten an tawiawm a ni.