Aizawl : Lawngtlaia ei leh in siam leh zuartute tan nimin khan ei leh in thianghlim leh himna chungchang zirhona workshop buatsaih a ni a. Lai autonomous district council (LADC)-a Sanitation changtu Executive Member Lalropuia Chinzah-in workshop hi a hawng.
Chief medical officer, designated officer (food safety) ni bawk Dr LP Malsawma kaihhruai workshop-ah hian CMO office Lawngtlaia Asst. Drug Inspector P. Laltlanzova'n ei in siamtute tana hriat tur dan food safety and standards act, 2006 leh thil dang pawimawh hrang hrang te a zirtir a. Zawhna leh chhanna hun leh sawihona hun an hmang bawk.
Food safety and standards act, 2006 hi India ramah mihring tana ei leh in tur ṭha, natna hrik laka him leh chakna pai siam chhuah leh mipui hnena pek a nih theihna tura dan siam niin, August ni 5, 2011 aṭanga hman ṭan a ni a. He dan hnuaiah hian ei tur siamna, vawnṭhatna leh zawrhna hmun chhinchhiah (registration & licence) te, ei tur siam chhuah leh zawrhte a ṭhat leh ṭhat loh enfiah te kalpui ṭhin a ni.
India rama ei leh in siamchhuaktu, chawluttu leh chhawpchhuaktu zawng zawng (a siamna hmunpui, restaurant, thingpui dawr, chhang siam, catering, nepnawi zuar, dawr, ran talh, etc)-in Food safety and standards authority of India (FSSAI) aṭangin phalna an neih vek a ngai a. Dan bawhchhia (registration/licence nei lova ei leh in zuar emaw, ei tur thianghlimlo leh him tawk lo zuar emaw) an awm chuan mana, hrem leh an thil siam pawh tihchhiat theih a ni bawk.
Lawngtlai district-ah ei leh in zuar (food business operator) sor- kara inziaklut 93 an awm mek a. Food safety kenkawh chungchangah Inspection team dinin, ei siamna hmun leh zawrhna hmun te an endik ṭhin a ni.