Somali venhim hna thawktute chuan Zirtawpni zan atanga khualbuk an luhchilha an hren mi 106 chu him takin an chhanchhuak thei ta.
Health ministry chuan darkar 30 chhung inbeih leh inhren a thlen chhung hian mi 21 an thi a, mi 117-in hliam an tuar tih an sawi a. Inbeihna tawp tawhin khualbuk pawh thunun leh tawh a nih thu thuneituten an sawi.
Khualbuk luhchilhtute hian Mogadishu-a Hayat Hotel chhung an luh hma hian a gate-ah thil tipuakin an lut zui a. Islamist hel pawl, al-Shabab chuan an tih a nih thu an sawi.
Police Commander Abdi Hassan Mohammed Hijra chuan chanchinbumite hnenah an chhanchhuah zat puangin hmeichhia leh naupang pawh an tel thu a sawi a, thi zat erawh a sawi lo.
Zirtawpni zan leh Inrinni ni lenga helho leh venhim hna thawktute inbeihna avangin khualbuk pawh hi a chhe nasa hle a, video thehdarhah pawh thil puak ri leh a chung atanga meikhu chhuak hluah hluah pawh hmuh theih a ni.
“Venhim hna thawktuten an luhchhuah fel tawh a, a beitute thah an ni a, darkar khat chuang in chhung atanga silai hmet puah a awm tawh lo,” tiin AFP news agency hnenah thuneitu pakhatin a sawi.
“A rapthlak a, thenawm maiah silai puak ri leh thil puak thawm hriat chu rapthlak tak a ni. Mogadishu-a thil thleng ka hmuh tawhah chuan la rapthlak ber a ni,” tiin Somalia-a national intelligence agency-a deputy director hlui, Abdisalam Guled chuan BBC.
Khualbuk luhchilh a nih laia a chhunga awm chhungte chuan an lainate hi an ngaihven tan mek.
“A chanchin kan hriat hnuhnung berah khualbuk chhungah hian ka unaupa a awm a; mahse, a phone a switch off mek a, eng nge a chungah thleng pawh kan hre thei tawh lo,” tiin sumdawng, Muktar Adan chuan a sawi tih AFP chuan a tar lang.