Aizawl: I&PR Minister Lalruatkima, Aizawl West II bialtu MLA hoin Inrinni khan Aizawl West Joint YMA hruaitute nen Aizawl West Joint YMA field chhehvela tuiluankawr leh bawlhhlawh paihte thenfai dan tur an enfiah.
Joint YMA field chhehvela tuiluankaw bawlhhlawhin a hnawhte an enfiah zawh hian Aizawl West Joint YMA Multipurpose Sports Complex Building-ah inkawmhona neih niin, bawlhhlawhin tuiluankawr a hnawh te thenfai a, a tul anga hma lak dan turte an sawiho
Aizawl West Joint YMA President Vanlalzuiliana kaihhruai inkhawmhonaah hian I&PR minister chuan bawlhhlawh paih chungchangah mi mal tinte leh khawtlang tanrual a pawimawh thu a sawi a. “State sorkar leh AMC-in bawlhhlawh paih dan tura a ruahman ang taka kan paih thin a pawimawh hle a. Mizote hian fai kan tlin a, fai tur hian hausak emaw, lehkha thiam san emaw a ngai lo a, a nihna ang tura bawlhhlawh paih mai kha a tawk a ni,” a ti.
Bialtu MLA hian Aizawl West Joint YMA Multipurpose Sport Complex Building-a hman tur table tennis board pahnih a hlan nghal bawk.
Inkawmna hunah hian Aizawl West Joint YMA hruaitute bakah an huam chhunga VC leh tlawmngai pawl hruaitute an tel a, Lalfakzuala Chenkual, AMC Councillor a tel ve bawk a ni.