Chief Secretary Dr. Renu Sharma-i’n Inrinni khan Lungleiah Lunglei district-a sorkar pisa hrang hranga hotute a kawm a. Office kal hun vawng uluka discipline tha taka kengkawh tur leh an thawh chhan mipuite tana dawr nuam taka awm turin a chah.
Dr Renu Sharma chuan Lunglei dist-a sorkar pisa hrang hrang hotute chu an project leh scheme enkawlahte harsatna an tawh chang nei thei an nih thu hrilhin, harsatna a thlenin sorkar hotute hnen thlen hreh lo turin a chah a. District tihmasawn tura mawhphurhna fawng vuantute an nih inhria a taima taka hna thawka, mipui hamthatna dah hmasa zel turin a chah a ni.
Chief Secretary chuan NH-302 Tlabung kawng laih mek chhe nasa chu veiawm a tih takzet thu pawh sawiin, Lunglei Bawrhsap chu he kawnf siam hnathawktu contractor te meeting lo neihpui leh thuai turin chah bawk.
Lunglei Bawrhsap Kulothungan-a’n Lunglei district dinhmun tlangpui leh sawrkar hmalakna thenkhatte Chief Secretary chu a lo hrilh a. Lunglei district-ah Covid19 dona atan CSR tanpuina Rs. nuai 200 chuang man hu leh ambulance pathum an dawn tawh thu sawiin, zirlai harsa mi 46 te a thlawna smartphone pek an nih thu te, ‘BALA (Building as learning aid) Anganwadi Centre panga siam a nih thu te leh ‘Go to the people project’ kaltlanga thingtlang khaw kilkhawr zawka chengte tan an khua ah ngei sorkar service-te chhawpchhuah thin an nih thu leh pawimawh dang te a sawi.
Lunglei SP Rex Zarzoliana Vanchhawng pawhin an hmalakna hrang hrang te Chief Secretary chu a lo hrilh a. Chief Secretary hian Hatchery-cum-poultry farm, Lungpuizawl, Govt. Fish Seed Farm, Zobawk, Civil Hospital Lunglei leh BaLA (Building as Learning Aid) Anganwadi, Pukpui te a tlawh nghal bawk a ni.