London-a cheng kum 20 mi Melisa Raouf chuan ‘history’ a siam ta a, Miss England intihsiaknaa makeup tel miah lova contestant inlan hmasa ber a ni.
Kum 94 chhungzet hlawhtlng taka kalpui tawh Miss England chanchina makeup tel lova inlan, contestant hmasa ber a nihnaah ‘natural beauty’ chawisan a tumna niin, a sawi.
Politics zirlai hian amah ang tho hmechhia leh tlema la naupang zawkte chu an pianpui mawina leh duhawmna chawilar zawk turin a ngen.
Heti anga huaisen taka a inlan hi judge te lawmah a tla a, semi-final round pawh awlsam takin paltlangin, tunah hian finals-a inlan tu rin a inbuatsaih chho mek a ni.
“Ka rualpui mai ni lo, hmeichhiate hian makeup hmang ngei ngei tura nawrna leh delhtu an nei reng. Kan vun leh taksaa kan lungawi phawt chuan makeup hman leh khuh mawi kha a tulin ka hre lo.
“Kan tlin lohna leh famkim lohna hian kan nihna dik tak a lantir zawk a, mimal ang theuh pawha kan danglam bikzia chiang takin a tarlang tel bawk. Kan tlin lohna leh that tawk lohna te thlengin kan pawm ngam a, kan chawisan a tul hlein ka hria a, mawina dik tak chu pangngai taka inlannaah hian a awm,’ tiin Melisa hian a sawi.
Amah leh hmeichhe dang 40 te chuan October 17, 2022 a Miss England thlannaa tlin ngei tumin an bei dawn a ni.
Judge te mai ni lo, mi zawng zawng tih mai turin an beisei loh leh rin loh lam daiha makeup tel miah lova Melisa inlanna hian thu a sawi ring hle a, khawvelhuap ang pawha chai laih laih ni tawhin, ‘natural looks’ chawisan tuma a hmalakna hian ‘welcome’ a hlawhin, an fak hle.