Aizawl: Mizoram Pradesh Congress Committee (MPCC) President Lalsawta chuan sorkar thaa mipuiin mi sual ep tura tanrual a ngai ngai lo tih sawiin, “Mizoram hi mi sual tlem tê tangrualin mi tha, tangrual ve lote an hnehna ram a ni tur a ni lo,” a ti.
Inrinnia Bungkawna Aizawl West III Congress Special Block Conference a hmanpuinaah Lalsawta hian dan rorelna (rule of Law) ngaih pawimawh a ngaih thu sawiin Mizoram mipuite chu court rorelna hnuaia thutluknaah an ngaih a tha ta chiah lo nia a ngaih thu a sawi a. Thil dik lo ti theuh theuh, MLA tihsual leh veng kil tawpah hmeithai fa tihsual thutlukna chu a danglam mek thu a sawiin, “Mizoram chu mi sual tlem tê tangrualin mi tha, tangrual ve lote an hnehna ram a ni tur a ni lo a, sorkar thaah mipuiin mi sual ep tura tanrual a ngai ngai lo,” a ti.
Lalsawta hian thuneihna insem zai a tul thu sawiin, mi dang chunga rinna nghat ngam lo mihring chu amah a rinawm lo tihna a nih thu a sawi a. Ram leh hnam dah hmasa loa politics khel, politician hausa nih tumten bansan tura chahin, “Kan ram siam turin mipuiin min nghak thup, a sawi ni lo, a tiha tih, a dika dik a hun tawh. A thlaka kan inthlak hlawk a ngai. Thluaka sum lut ang chi chu kan zingah an tel ve thei lo ang. Tel tur pawhin kan duh lo,” a ti.
He hunah hian TT Zothansanga, Ex-MLA leh Zodingpuii, Ward-XV Councillor te pawhin thu an sawi a ni.
Aizawl West III Congress Special Block Conference-ah hian Mizoram nu leh pa nih tling, ram buai lai pawha Zoram tana sulhnu duhawm tak tak hnutchhiahtu, Dr Lal Thanhawla hi an theihnghilh theih dawn tawh loh thu te, sorkar hrawn mek MNF party sorkar pachhe tak hi Zoram mipuiin an ning tawh tak zet a, leiba tam tak hnutchhiah thintu MNF sorkar hi tawp vat vat se tih leh Congress party President Lalsawta chu an rintawk thu leh sorkar kalphung dik leh tha thlentu atan an rin tawk thute resolution an siam a ni.