Zirlaite hi an dikna chanvo a that thu kan hriat tel ve a ngai
Tunhnaiah zirlai naupang hrem chungchangah boruak lian tham a rawn awm hluai mai a, Lunglei district khaw pakhatah chuan an zirtirtuin pawl khat zirlai hmeichhe naupang pakhat chu thawmhnaw inbel mumal lovin school atangin a hawtir nia sawiin, thubuai ziahluh a ni hial bawk.
India ram danah hian zirlaite hi humhalhna leh an dikna chanvo tha tak tak a awm nual mai a, misual ber ber pawh nise, an nungchang leh an rilru sukthlek thlenga la siamthat theih an nih avangin an chanvo pawh a tha hle. Hei tak hi zirtirtute pawhin kan hriat thar fo a tul awm e.
Facebook-a nu pakhatin post a siamah chuan a fanu chu a zirlaipuiten kut an thlak fo a, thiin a luak phah thin tih tar langin, a fanu kutthlaktu chu an sikulah kalchilhin a hau a, hei hi an zirtirtunu chuan a huatpui a, a fanu chu sikul a kal tawh loh tur thu a lo hrilh tiin, hemi hnu hian a fanu chu an zirtirtu nu hian saruakin sikul atangin a hawtir tih a tar lang a, pawl hrang hrangin an ngai thutakin he naupang hi damdawiah a awm lehzel nen, sorkar beng hial a thleng ta chu a nih hi.
A enga pawh chu lo nise, zirtirtute hian naupangte dinhmun leh rilru sukthlek thlenga siamtha theitu kan ni tih hi kan inhriatthar a tul a, a thang mawi lo zawnga khawsak hi i hlau fo teh ang u. Zirlaite hian dikna chanvo tha tak tak an nei ve tho tih thleng hian rilru puitling zawk chuan kan hriatreng a tul awm e.