AMC Ward VIII councillor Christina Roluahpuii Sailo chuan AMC Property Tax Return atanga an ward chhung, Armed Veng leh Armed Veng South Taxi Stand bula hulhliap siam chu nimin khan a hawng.
Hulhliap siam hna hi veng pahnih taxi stand welfare-ten an thawk a, a hawnna hun pawh hi anmahni buatsaih a ni.
AMC Property Tax Return hmanna tur hi Ward VIII Committee-ten an rel a ni a. Chite Vengah pawh hulhliap hi siam mek a ni a, zawh fel tep tawh niin, a siam hna chu an branch YMA-in an thawk thung.
Veng pahnih taxi stand welfare-te chuan thuchhuah siamin an stand bula an passenger-te thut hahdamna tur hulhliap siamna tur an councillor-in a ngaihtuahsak mai bakah hulhliap siam hna a thawhtir nghal chu an lawm tak zet thu an tar lang.