US Open champion lai Emma Raducanu chuan a lallukhum humhim tura fiahna hmasa ber a paltlang zo lova. Alize Cornet lakah straight set in a tlawm.
Thawhlehni zanah kum 19 mi British star hian 6-3 6-3 in ani aia tawnhriat nei tha Cornet hi a hneh lova. An inkhelh chhungin a khingpui hi tlan tam leh court chhunga ball vuak kualah a tluk lo.
Seeded number 11 hauhtu Raducanu hi nikuma qualifier ni chunga New York-ah hian a champion hnuah a che tha tluang hleithei lo zui a. Kuminah tournament vawi 15 khelin vawi 13 a chak a, vawi 16 a tlawm.
US Open zawha world rankings tihchhuah turah nasa takin a tlahniam dawn a. “Ka tournament ngainat ber a nih avangin first round a tlawm hi a na. Mahse kuminah ka tan thil tam tak a thleng a, rankings a tlak pawh hi ka tan thil tha a ni thei. Bul kan tan that lehna a ni dawn a, sang takah ka rawn chho leh dawn.” tiin Raducanu chuan a sawi.
Wimbledon champion Elena Rybakina pawh tla hma langsar zingah a tel a. Qualifier Clara Burel lakah 6-4 6-4 in a tlawm.
Vawi hnih US Open champion tawh Naomi Osaka pawh 7-6 (7-5) 6-3 in seeded no. 19 Danielle Collins lakah a chak lova. Hetihlai hian Polish star Iga Swiatek chuan darkar khat leh minute 6 chhung lekin Jasmine Paolini 6-3 6-0 in a hneh ve thung.