Mipa tennis chanchin a Grand Slam title la ngun ber Rafael Nadal chuan US Open round hmasa berah awlsam taka chak mai tura ngaih a nihlaiin inkhel tan tir lamah a talbuai hman a. Australian mi wildcard hmang a tel Rinky Hijikata chu chhanglet in hnehna a chang.
Thawhlehni zana inkhelah kum 36 mi Nadal hian set hmasa ber a hloh hnuah 4-6 6-2 6-3 6-3 in a khingpui hi a hneh a. Arthur Ashe Stadium-ah kum 21 mi world number 198 hi inkhel tir lamah a chai tawk hle.
Grand Slam tournament a vawikhat khelhnaah Hijikata hian set hmasa bera break point awmchhun chu hmang tangkaiin Nadal hian a khingpui service hi vawikhatmah a break sak lo.
World number three hian set hnihna atang erawhin inkhel kaihruaiin a tang mar thei tawh a. Hnehna chang zui mahse a tan a tawp thleng a awlsam bik lo.
“Ni 50 chhung vel ka inkhelh loh avangin thlir thui lutuk thei ka ni lo. Practice-ah uluk taka ka inbuatsaih a ngai a. Tunah chuan chetsual loha, ka dinhmun ang zel pawm hi ka tana tha ber rih a ni.” tiin hnehna a chan hnuah Nadal a tawng huai rih lo hle.
Kumin US Open a rinkai zinga tel Nadal a hnampui rawlthar beiseiawm Carlos Alcaraz pawhin second round a lut. Sebastian Baez chu inhliam avanga khel zo lovin Alcaraz a tlang.
Kum 19 mi hi 7-5 7-5 2-0 a hma a hruai laiin Baez hi a inkhel zawm thei lova. Argentinian mi pawh hi hmabak nei eng taka ngaih niin an inkhel a hmuhnawm hle. Alcaraz hi Flushing Meadows-ah hian a champion chuan world. no.1 thar a ni thei dawn.