Punjab-a Tarn Taran district-ah mi thenkhatten Thawhlehni zan khan biak in luhchilhin Isua leh Mari lim an suasam nia hriat a ni a, pastor car an hal bawk.
Video leh thlalak darhah chuan car kang lai leh biak in chhunga milim keh darhte hmuh tur a awm.
Biak ina CCTV daha a lan dan chuan mi pakhat, puan sena lu tuamin hrei hmangin milim hi vawi tam a chek a, a lu pawh chhuatah a tla a. Milim hi thukruk a tum bawk nia hriat a ni.
Hetianga Kristian hmun suasam hi Sikh hmunpui pakhat, Akal Takht Jathedar-a an hotuin Kristian missionary-ten an mite an sakhuaah an inleh luihtir nia a puh hnu lawkah a ni.
“Kristian missionary-te hian tihluihnain Sikh-te an inlehtir a. Punjab-a Sikh leh Hindu-te chu hruai kawi niin an inlet a ni. Hei hi sorkar pawhin a hria a, sakhuana behchhana hmangin maksak tak taka thil an ti (superstitious practice) a, an vote hmuhna a nih avangin sorkarin heng missionary-te laka hian engmah tih tumna a nei lo,” tiin Giani Harpreet Singh chuan Thawhlehnii khan Facebook live video-a thu a chhuahah a sawi a ni.
Zan lama beihna thleng pawh hi he thuchahin a hrin ni ngeia ngaih a ni a, a hma pawhin Sikh hruaitute hian tihluihnain Kristian missionary-ten an mite chu an inleh luihtir fo niin an lo sawi tawh thin.
“Punjab hi ramria awm a ni a, ram dang atanga puihna dawngin sakhuana thilah beihpui thlak a ni thin,” tia Giani Harpreet Singh chuan sawiin, sorkar laipui chu hetiang thil thunun tura che turin a ngen.
Biak in suasam hi Thakarpur khua, Patti assembly bial, Tarn Taran district-a thleng a ni.
Nihang Sikh an tih, Sikh warrior-te chuan sakhaw inleh luihtirna awm thin nia sawi duh lohna an lo lantir tawh.
Akal Takht pawh hi Nihang-te thlawptu niin ‘pastor lem’-ten Sikh-te hruai kawiin an inlehtir thin niin an sawi a. “Pastor lemte lakah hian Black Magic Act hmanga thubuai ziah luh tur a ni,” tiin an pawl hian an sawi.