Tling lo chunga press mi nih ve ngawt tum a fuh dawn lo
Khawvel hmasawnnain nasa takin min luhchilh ve zel a, kawng awlsam leh hmanraw awlsam min chhawp chhuahsak zel bawk. Hman thiam loh chuan chhiatna, a hmang thiam tan erawh malsawmna khawvel a ni ber tawh mai.
Chutiang hmasawnna leh awlsamna khawvelah chuan mahni thua ke lo pen a, lo inla professional fe fe a awm theih bawk a, youtube-ah lut ila chutiang mi chu hmuh tur tam fe a awm bawk.
Chanchinthar rintlak leh dik chhiar duh tan newspaper leh tv kaltlanga en tur a awm reng laiin, a thupui mi mit la ran tura bawl kualin social media lamah kan tidarh chuai chuai thung a, thenkhat hi chuan a dik leh rintlak hi an phungthlu vak lo tih a hriat thin.
Nitin eizawnna atana chanchinbu hmang, inzawmkhawmna pawlah pawh rintlak tia tel thlap an awm laiin, chung mite dinhmun ang awt, ni ve tura paltlang ngai engmah paltlang ve si lote an awm nawk niin a lang a, press mite zahawmna tibo a, sorkar in a humhalhna hrang hrang mahni thua lo zawm ve ngawt tum an awm leh thin. Heng mite hi sorkar hian khauh leh khirh zawkin dap se la, tun hnaia hemi chungchang an ngaihtuahna pawh hian rah tha chhuah chho nghal zel se a tha hle.
Thutkhawmnaah hian press ID leh press sticker lem hmanga press dikna leh chanvote dik lo taka lo hmang thin an awm chu sorkarin a ngai thu tak hle a. Hetiang thil hi a awm zui zel loh nan ruahmanna siamin hemi kawnga mawhphurtu hrang hrangte chu hma lak dan tur hriattir nghal a ni, tiin sorkar pawhin thu a dah tawh a, kengkawh tha chho mawlh se a duhawm hle.