Russia-a tuialhtheia sumdawng lian, Lukoil-a an chairman, Ravil Maganov chu Moscow-a a awmna damdawi in tukverh atanga tlain a thi.
Company pawhin a thih thu hi an puang tawh a; mahse, kum 67 mi, Maganov-a hi ‘natna na takin a tlakbuak avangin a thi’ niin an sawi thung.
Russian chanchinbute chuan Maganov-a hi Moscow-a Central Clinical Hospital-ah enkawl mek a nih thu leh a hliam tuar lova a thih thu an tar lang hlawm.
Maganov-a hi Russia rama tun hnaia mak tak tak, rinhlelhawm tak taka sumdawng lian thi thar ber a ni leh mek.
Chhui hna thawhnaa thuneitute chuan engtianga thi nge tih a hmunah an chhui mek tih an sawi a. Tass news agency chuan chhawng rukna tukverh atangin a tla niin an tar lang a, a hnuah ama intihlum niin an tar lang zui bawk.
Russia-in Ukraine a rûn tan hnu lawkah khan Lukoil board chuan buaina chu a theih anga ranga tihtawp ni se an duh thu an puang a, ‘chhiatna thleng’ tuartute an khawngaih thu an sawi bawk.
April thla khan an billionaire president, Vagit Alekperov chu Russia-in Kyiv a rûn duh lohna lantir nana UK-in a hrek hnu lawkah a lo bâng tawh.
Lukoil hi Russia-a mi mal company lian ber a ni a. Thuchhuah an siamah khawvela energy firm lian ber pawla chhawp chhuaktu Maganov-a’n mi a enkawl thiam bikna chu a liam ta tih an tar lang.
Maganov-a hi kum 1993 khan mi mal oil company-ah thawk tanin kum hnih hnu lekah chairman-ah a kai hman a ni.