India hian aircraft carrier pahnih, INS Vikramaditya leh Vikrant a nei ve ta tihna a ni a, navy hotu liante erawh chuan pakhat tal an la mamawh belh tih an lo sawi tawh thin a; mahse, sorkarin sum a la ruahman lo.
Vice-Admiral chawl tawh, Vikrant buaipui a nih laia thawktu, AK Chawla chuan tuna tih nghal leh tih loh duhthlan tur an nei tih a sawi a. China chu entirna atana hmangin tuipuia an hmanruate an thuam chak nasa tih a sawi a ni.
“Carrier hi zan khata peih mai chi a ni lo va, hun tam tak a mamawh a, Vikrant ang hi hmelmaten min nanchin hmaa kan lawng rual ven nan, hla taka tei chhuah nan leh hmelma lawng tukdawl nan kan mamawh,” a ti.
Beijing hian kum 2012 leh 2022 inkarah aircraft carrier pahnih puitlinin pathumna tur a sa leh mek a. Sipai ngah lamah khawvela a ber niin United States pawhin an zat lo.
Lawng sakna hmun, Cochin Shipyard-a chairman leh managing director Madhu Nair chuan tun tuma an sakah tihkhawtlai ni deuh mah se a dang sa leh tura inrintawkna an ngah thu a sawi.
“Kum 13 hi a tha ber a ni tih ka sawi tumna a ni lo va, a aia thain kan ti thei a, chutih rual chuan kan vawi khatna a ni tih hriat thiam a ngai,” a ti.
Vikrant sak nana bungrua (part) an hman zinga 76% zet hi India ram chhunga siam a ni a, Indian firm 500 velin kuthnu an nei tihna a ni a. Navy leh Cochin Shipyard chuan Vikrant sak hautak tak hian India-in a ram a venhimna lamah tha a tihchak ngei an beisei tih an sawi ve ve.
Shipyard hian kum 2024-a peih hman tur lawng sakna hmun thar an buaipui mek a, hetah hian India aircraft carrier thar tur sak a ni dawn niin Nair chuan a sawi.
“Carrier dang kan sa leh dawn a nih chuan a hma aia ranga inpeih turin kan intiam,” a ti.