Aizawl: Mizoram State Commission for Protection of Child Rights (MSCPCR) chuan nimin khan an pisa-ah tun hnaia naupang kaihhnawih pawikhawihna thlengah naupang kumtlinglo hming leh nihna, digital media/YouTube-a pho lan a nih chungchangah YouTuber thenkhat chu ko khawmin a zilh.
Commission Chairperson Dr. C. Lalsangzuala chuan tun hnaia internet social media – YouTube, Facebook, WhatsApp leh digital media platform danga naupangte hming, thlalak leh video dan kalha pho lan a ni thin chu an ngaihmawh thu a sawi a. “Nakin zela naupang an than len huna khua leh tui tha an nih theihna tur kawng daltu leh mi dangin an chhinchhiah bik theihna tur thil pawi tak a nih avangin, JJ Act 2015 Section 74 hnuaiah khap tlat a ni,” tiin, dan bawhchhetute chu hrem an nih theih nan commission chuan hma a la zel tawh dawn tih a sawi a, fimkhur turin a chah.
JJ Act 2015 Section 74 hnuaiah hian naupang dan kalh a che emaw, naupang venhim ngai emaw, pawikhawihna tuartu emaw, pawikhawihna thlenga thuhretu emaw chu an hming, address, sikul emaw an chanchin dang, an nihna tilang thei tur pho lan leh puanzar khap a ni a, bawhchhetute chu thla ruk thleng lung in tantir emaw, Rs. nuai hnih thleng pawisa chawi tir emaw, a pahnih emawa hrem theih an ni.