Premier League champion Manchester City in striker rinrawl neih an duh a, mahse an duh ang tak lakluh tumin an nghak rei. Nghah man erawh awm hle in striker thar Erling Haaland chuan match hnih chhungin a hattrick vawi hnihna a siam a, Nottingam Forest an sawpna kawngah a langsar.
Norwegian striker hian Crystal Palace lakah minute 19 chhungin goal thum a khung tawh a, Nilaini zanah minute 26 chhungin goal thum a khung lehnghal a. City hi 6-0 in an chak
Etihad Stadium-ah Haaland hian minute 12-naah goal hmahruai a khung a, a ball vawikhat tawhnaah goal a khung nghal.
Minute 23-naah City ball inpek kual mawi chu a hmawr bawktu ah a tang a, minute 38-naah boruakah a hlauhawm tih lantirin a khung belh.
Joao Cancelo chuan goal mawi second half-ah khungin mi thar dang Julian Alvarez chuan a club thar tan goal hnih a khung ve leh bawk.
Haaland hian Premier League a khelh tawhah game 5 atang goal 9 a khung tawh a. Minute 44 dana goal khung ziah ang niin ball vawi 11 a tawh apiangin goal a khung ang a ni bawk.
“Sergio kha legend a ni a, City fans thinlungah hliahkhuh thei an awm dawn lo. Mahse Erling hi khatiang kha a ni ve thei dawn. Norway, Austria leh Germany a hnuhma a neih tawhte helaiah chhunzawm a tum.” tiin Pep Guardiola chuan a player thar a fak.
Ham tawp hma chiahin Liverpool an chak
Liverpool in goal kua an khung hnuah league-ah a vawi hnih nan chak an tum a, an tumah hlawhtling mahse an tum dan angin thil a kal lo.
Anfield-ah Newcastle United an mikhual a, point an hloh teuh hle hnuah 2-1 in an chak hram.
Magpies tan striker thar Alexander Isak chuan goal hmahruai second half tan tir lamah a khung a. Liverpool tlarhnung a phui lo leh tawh.
Sweden striker hian an goal hnihna khung leh mahse offside avanga pawm a ni lo. Minute 61-naah Roberto Firmino chuan Liverpool si phurh a sut a. A tawp thlengin Reds in beidawng lovin an nawr a, a rah seng ta ngeiin huntawp dawn hun pekbelh minute 8-naah Fabio Carvalho chuan an chakna goal a khung.
Liverpool boss Jurgen Klopp chuan, “Result pui tak a ni. Kum tam tak chhung kan la sawi fovang. A tawp thleng khan beiseina kan nei em ka hre lova, mahse tun atang chuan beidawng miah lova a tawp thleng kan tan ziah a ngai tawh a, awmzia a nei tih zaninah kan hmu.” tiin a sawi.
Arsenal an la chak
Premier League bul tan tha Arsenal in an khelh apiangah hnehna an la chang a. Beisei pha lo Aston Villa chu 2-1 in an hneh.
Emirates Stadium-ah striker thar Gabriel Jesus chuan tun season a a goal thumna a khung a. First half-ah Arsenal in inkhel an thunun hneh hle.
Minute 74-naah Douglas Luiz chuan Aston Villa beiseina siamin goal khung mahse an lawm rei lova, minute thum hnuah Gabriel Martinelli chuan Gunners chakna goal a khung.