India chhim lam, Karnataka-a police chuan Hindu sakhaw hruaitu hriat hlawh tak chu sikul naupang kumtlinglo hmeichhe pahnih pawngsuala puh a nih avangin an man.
Shivamurthy Murugha Sharanaru-a hi Lingayat hnam/khawtlang mi a ni a, an hnam hi an state-ah chuan Hindu-ah pawh a lian ber an ni a, hmeichhe naupangte hi a seminary-ah a khawih nia puh a ni.
Ni ruk liam taa a laka complaint thehluh a nih hnuah Ningani zan khan an man ta a, man leh puh hmingchhiat duh lohna hi nasa taka lantir a ni bawk.
Sharanaru-a hian an puhna hi a pha a, amah phiartute thiltih mai niin a sawi.
Zirtawpni chawhnu khan court-ah hruai a ni a, nawrhlirha chuangin a inlan nghe nghe a, ni li chhung police-in an kawl tura tih phawt a ni.
Kum 64 mi zawlnei hi Protection of Children from Sexual Offences (POCSO) Act hmanga thubuai siamsak a ni a. A naupang khawih nia insawi pakhat zawk hi hnam hnuaihnung, tun hmaa khawih thiang lo an tih thin, Dalit a ni tih hriat a nih hnuah police hian Scheduled Caste Scheduled Tribe Atrocities Act hmangin thubuai an siamsak bawk.
Lingayat-te hi middle caste an tih zinga mi niin Karnataka-a mihring cheng zinga 17% lai an tling a. An hawi lam chu a tlangin politics-ah pawh huhang an ngah hle a, an state-a chief minister ni tawh tam zawk hi an hnam an ni.
Karnataka-ah hian Lingayat hian sakhaw hmun (mutt) 2,000 vel zet an nei a, hengte hian college pawh an nei nual bawk.
Sharanaru-a hi Chitradurga khawpuia Murugha Mutt hotu ber a ni a. He mutt hian sakhua leh zirna in pangngai 150 chuang an nei a ni.
An seminary-a zirlai hmeichhe naupang pahnihin Mysore khawpuia hlawkna um lo pawl hnenah kum eng emaw zat chhung tisa thilah a khawih thin niin an thlen a, August 26 khan a lakah hian thubuai thehluh a ni ta a ni.
Complaint an thehluhah chuan hmeichhe naupangte hian Sharanaru-a hian a pindan (chamber)-ah kovin mipat hmeichhiatna hawiin a khawih lui thin niin an tar lang.
Mawi lo taka zawlnei puh a nih hnuah hian Chitradurga leh district dangah hetiang thil a thleng duh lohna hi nasa taka lantir zui nghal a ni a, sakhaw hruaitu chu a rang thei ang bera man an phut thu an sawi hlawm.
Hetih rual hian zawlnei tantu pawh an tam ve tho va, chief minister hlui, BS Yediyurappa pawhin Sharanaru-a chu ‘dik lo takin, phuahchawpa hek’ niin a sawi a ni.
“Chhui hnuah pawikhawih a ni lo tih a lang dawn a. Chhuinaah zawlnei phiara puh chhiatnaa inhnamhnawih chu an hriat mai ang,” tiin thuthar lakhawmtute hnenah a sawi.