Prime Minister Narendra Modi chuan Central Vista chei thata peng pakhat, Rashtrapati Bhavan atanga India Gate inkar kawngpui, Rajpath tia hriat thin, Kartavya Path tia a hming thlak tak chu Ningani khan a hawng a. Hemi rual hian Netaji Subhas Chandra Bose-a lim a hawng bawk.
Rajpath hming thlak chungchang hi Modi-a hian Independence Day lawmnaah khan lo sawi tawh, ‘min awptute rilru kha a thara thlak zel’ tumna a nih thu a sawi.
‘Raj’ tih hi ‘thuneihna’ tihna a ni a, ‘kartavya’ erawh ‘tih tur’ tihna a ni.
Sorkar chuan thuneihna, Rajpath atangin vantlang ta leh tanrualna lantir nan Kartavya Path-ah thlak a ni tih a sawi.
Rajpath hi India-in zalenna a neih a lawm leh Republic Day a lawm thin nen thui tak inzawmna a nei a. Heng ni pawimawh pahniha kalrem lâma lâmte kawng zawh thin niin Raisina Hill complex atangin India Gate, tun hmaa Kingsway an tih thleng an zawh thin.
He hmun hi British Raj-ten Calcutta (tuna Kolkata) atanga kum 1911-a an khawpui an sawna ‘New’ Delhi an din atanga khawpui laili atana an duan a ni.
Modi-a sorkar hian heng hmunte hi Central Vista redevelopment project tia vuahin cheihnum thar vek a kalpui a. India Gate bik chu tihdanglam a ni lo va; mahse, a bul zawng zawng chu tuaihnuma thil thar tam tak dah a ni.
Sorkarin ruahmanna a siamah chuan inzawrhna tur (vending zone) panga siamin hengah hian thil zuar 40 zel an awm thei dawn a. Ram pawn leh India ram hmun dang atanga khualzinten Delhi-a an hmun tlawh nasat ber, India Gate leh a chhehvelah hian ice-cream zuar an tam thin a, ruahmanna tharah erawh mumal zawkin an inpho thei tawh dawn a ni.
India Gate bul maiah hian dawr pangngai awmna hmun hnih, pakhata dawr pariat awm theihna siam a ni bawk a. Sorkar chuan heng dawrte hi state eng emaw zat chuan food stall atan an be hlawm niin a sawi a, hei hi puitlin theih a nih chuan awlsam zawkin street food a hmuh theih dawn tihna a ni.
Prime minister pisa chuan Rajpath leh a chhehvel, Central Vista huam chhungah hian mihring an pung chak a, chu chuan hmunhma ding sate a tiderthawng thei tih a lo sawi fo tawh a. Hemi ven nan hian vantlang inthiarna, tui in tur, khawlaia thutna leh lirthei hunna pawh tihchangtlun vek a ni.
Rukru emaw, a hmunhma tihmelhem duh emaw an awm lohna turin tih dan thar — sign tha zawk, khawnvar, fountain dah thar a ni a. Police tam tak bakah a vengtu tur mi 80 dang dah belh a ni tawh dawn bawk.
Tuna Rajpath chei thar hawn hi Central Vista project peng pakhat chauh a la ni a. Project hian parliament building thar, Central Secretariat thar, prime minister chenna tur in leh pisa thar leh Vice-President’s Enclave pawh a tel a ni.
Netaji Subhas Chandra Bose-a lim thar, India Gate hnuaia dah hi granite tlan, tonne 280-a rita siam a ni a, feet 28-a sang a ni.
He hmunah hian tun hmain sipai hriat loh, ram tana nun hlantute hriatrengna, Amar Jawan Jyoti a awm thin a, kumin kumtir khan National War Memorial-ah sawn a lo ni tawh.
Milim siam tur hian a chhertu team chuan darkar 26,000 zet hun an hmang a. A lung phur tur hian truck feet 100 zeta sei, ke pawh 140 nei chu duan niin Khammam, Telangana atangin New Delhi thleng, km 1,665 zet phurh a ni.