Haryana putar kum 102 mi, sorkarin thi tawh anga chhinchhiaha tar chawmna an pek thin an tihtawpsak chuan a thih lohzia lantir nan Nilaini khan chawmna an tihtawp a duh lohzia lantirin vantlang zingah a inlan.
Rohtak district-a cheng, Duli Chand-a hi chanchinbumite hmaah inlanin a la damzia a pho lang a. A hnuah khawpuiah kalin sorkarin a pension lawmman an tihtawpsak chu a rang thei ang bera an pek leh theih nana an karna hmunah a tel ve.
“March kha tar chawmna ka dawn hnuhnung ber a ni a. Hemi hnuah hian min pe tawh lo va, sorkar chhinchhiahnaah thi anga tar lan ka ni a. Hemi hnuah hian vawi eng emaw zat ka la dam tih lantir tumin ka bei a, awmzia a awm thei lo,” tiin Chand chuan a sawi.
Amah ngei a nihzia inlantir nan a Aadhar card, PAN card, an chhungkaw ID leh bank statement te pawh chanchinbumite hmaah hian a pho lang a ni.
A tupa chuan thla khat chuang liam tawhah khan Haryana Chief Minister’s Grievances Redressal & Monitoring System-ah complaint an thehlut tih a sawi a; mahse, chhanna engmah an dawng lo.
Haryana unit Aam Aadmi Party (AAP) president thin, Naveen Jaihind chuan Chand-a hi thuthar lakhawmtute kiangah hian tawiawmin a rang thei ang bera a pension dawn thin pek chhunzawm leh a phut.
“Kum upate pension tihtawpsak hi a vanduaithlak a. Chief Minister’s grievance redressal cell-a thlen pawhin engmah hmalakna a awm lo,” tiin a sawi.