Aizawl: ZPM thalaiin Minister of State Robert Romawia Royte-in thu diklo a sawi nia sawiin, “MNF minister zinga thiltithei ber hi dawt sawi bansan turin kan ngen,” an ti.
ZPM thalai chuan tun thla ni 7-a Bethlehem Vengthlang YMA hall-a Aizawl South I block MNF-in mi thar lawm luh inkhawm an buatsaihah Robert Romawia Royte chuan Rajivnagar-ah Lalduhoma’n mi 40 chuang lawm luta VC bye-election-ah vote ruk chauh hmu leh si angin a sawi nia sawiin, hei hi thu dik lo a nih thu an sawi a, “Rajiv Nagar I-ah ZPM-in lawh luh kan nei lo,” an ti.
Tun thla ni 7 veka Robert Romawia Royte-in assembly session-a Aizawl South I bialtu MLA C. Lalsawivunga zawhna a chhanna atangin Aizawl South I huam chhunga AMC leh local council inthlan dawna a thil tiamte pakhatmah tihhlawhtlin a la neih loh thu a hriat theih niin ZPM thalai chuan an sawi a. Hei hian Robert Romawia Royte chu Aizawl South I bial mipuite hmusittu a ni tih a târ lang nia sawiin, “A thil tiamte pakhatmah puitlin a la neih loh laia Aizawl South I biala a kal ngam kha Aizawl South I mipuiten mak an ti hle,” an ti bawk.