Aizawl: Mizoram Legislative Assembly pariatna thutkhawm vawi 10-na, September 6, 2022-a tan chu nimin chawhnu dar 4:22 khan a tiak.
Ni 3 chhung awh session tihtawp a nih hma hian Assembly Speaker Lalrinliana Sailo chuan tun tum session-a thiltihte a tar lang a, sorkar bill pahnih – The Mizoram Goods & Services Tax (Amendment) Bill, 2022 leh The Mizoram (Land Revenue) (Amendment) Bill, 2022 pass a ni a, presentation report pathum leh lehkha pawimawh 13-te chu house dawhkanah pharh a nih thu a sawi.
Zawhna leh chhanna luh dan sawi bawkin, starred question pawm 184 zinga 13-te chu house chhungah chhan a ni a, unstarred question pawm 104-te chu chhan a nih thu a puang.
Assembly Speaker Lalrinliana Sailo chuan National eVidhan Application (NEVA) an kalpui tan chu a nihna ang takin an la hmang lo tih sawiin, “Session lo awm zel turah chuan lehkha hmang loa session kalpui kan tum tawh dawn,” a ti a, member-te pawh iPad-te hmang tangkaia hemi lam hawia inzir belh zel turin a chah bawk a ni.