Beisei anga tun season la hmang lo Liverpool chu an tlawm leh a. UEFA Champions League Group A a an inkhel hmasa berah Napoli in 4-1 in an lo sawp.
Reds hian Stadio Diego Armando Maradona-ah first half-ah goal thum an chhuah hman a. An goalkeeper Alisson-a’n penalty save a neih bakah defender Virgil van Dijk chuan goal ngei tur dang hman hram bawkin an chhuah belh teuh thei.
Piotr Zielinski chuan minute 5-naah goal hmahruai a khung a. Hemi hma hian Victor Osimhen-a’n goal ban a pet per tawh.
Chawlhlawk hma in Andre-Frank Anguissa leh Giovanni Simeone ten goal khat ve ve an khung ve leh a. Second half-ah Zielinski bawkin an goal hnuhnung a khung.
Liverpool tan Luis Diaz chuan second half tan tirah goal khat a khung a, Van Dijk leh Mohamed Salah ten chance nei ve ve bawk mahse Italian khingpui lakah Reds an che thei lova. A bikin tlarhnungah defender Joe Gomez a talbuai thin hle.
Player inhliam in a tihbuai bawk Liverpool hian midfielder pawimawh Thiago chu huntawp dawnah an luhtir thei tawh a. Midfielder thar Arthur pawh second half-ah an khelhtir a. Anni hian inelna hrang hrang match sarih atanga vawi hnih chiah la chak hi kawng dik zawhpui theih ngei an inbeisei ang.
Barca striker Lewy a vul
Barcelona in tun nipuiah ngawrh tak maiin Bayern Munich striker Robert Lewandowski an ngaihven a. A chhan chiang taka langin an tana UCL inkhel a hmachhawn hmasak berah hattrick a siam nghal.
Camp Nou-ah Barca in Viktoria Plzen an mikhual a. Minute 13-naah Franck Kessie hmangin goal hmahruai an khung nghal.
Lewandowski-a’n chhunzawmin halftime hma leh hnuah goal a khung a. A inkarah mikhual lamin Jan Sykora goal an nei ve.
Second half-ah Barca in an hna ngai an chhunzawm leh a. Polish striker in a goal thumna a khung hnuah Ferran Torres chuan goal khat dang a khung belh.
Barcelona coach Xavi Hernandez chuan, “Robert hian duhtawk a nei lo. A training neih danah pawh a ni a. Team tana a inpekna, a thawhrimna leh inngaihtlawmna te hi kan chakna a ni. A hattrick vang chauh ni lovin a thawhrimna leh rilru puthmang avang hian a fak loh theih loh.” tiin a striker thar a fak uar hle.
Italy-ah Bayern an chak
German champion in San Siro an pan a. Inter Milan nen inkhelin 2-0 in result pawimawh tak an nei.
Germany international winger Leroy Sane chuan minute 25-naah goal a khung a. Joshua Kimmich ball cross chu thiam taka la in Inter keeper Andre Onana goal-ah a khung a. Second half-ah Kingsley Coman nen an thawhrah atangin goal a khung a. Inter captain Danilo D’Ambrosio chuan a ball pet an goal-ah a lo dang lut palh.
Bayern coach Julian Nagelsmann chuan, “Leroy khan tun inkhelah tihthat zual tak pahnih a nei. A goal khungna turah Joshua ball pek a lak dan kha thil namai lo tak a ni a, fak ngei ngei a phu. Goal hnihna pawh kha a tlan chak dan leh a chetdan avangin fak a phu hle.” a ti ve bawk.