- F. Vanlalrochana
1994 hnu lamah Musical band tam tak a awm a. Band zawng zawng kan chai hman dawn lo a. Band lar zual leh ding rei deuh leh tlema langsar deuha kan hriatte kan han lam chhuak dawn a. An hla zawng zawng pawh kan chhuiin, kan chai seng dawn lo a. Kan khaikhawm deuh puat puat anga, an hla hit pahnih khat han lam chhuahte chu kan nei ve chauh dawn a ni.
A) 1994 hnu lama Band active tam zawk hian, sap hla an sa tam. Band tam tak an ding a. Prominent deuh hlek ho kan han sawi a ni. Gospel band hi an tam zawk deuhin ka hria a, platform an ngah zawk vang ni maw. Mahni hla sa an tam a, sap hla an sak tam tak pawh anmahni phuah a ni.
B) Tribal Power hlaah hian, hnam thil kan hmu fo. Chu chu a hlu ka ti. Band dang hoa kan hmu loh hi hmuh tur a awm. Chu chu band dang tam tak aia mi mal taka ka ngaihhlutna a ni. Pu Bengkhuaia lehkha te, Zofa leng tihte hla tha tak tak kan hmu a ni. Chu Chu tribal Power hla chungchang bikah chuan sawi lan loh thiang loa ka dah a ni. Pu Bengkhuaia lehkha ang chi khi, Pu Opa single ang deuh chu a ninain, Tribal Power Opa a nih angin Tribal Power legacy chhungah kei chuan khung ka duh a ni. Tribal power hla lar dang, ‘I belh pawn’, ‘Aizawla mi ngei’ tihte chu vawiin thlengin kan la hria a. Tribal power hlaah hian, nula sepna hla kan hmu nual. Thian ho khawilai dawr emaw, kawn remchanga thu ho a, an nula hmuhte sep zuia, hlaa chan tir tak ang chi hi a awm zauh zauh hmelin ka hria.
C) Dream Hunter pawhin hla lar tak tak an nei a. Hla thu har tak tak an hmang lem lo a. Love song huanga khung tur an sa tlangpui. An hla thluk a nalh a, an zaitupa ber a zai thiam a. Hla thu hriatawl leh chhinchhiah awl tak tak an hmang.
D) Albatross hi active tawh lo mah sela, vawiin thlengin an band hi sawi lan an la ni thin. Albatross hi a literature a zawng chuan an hla a tha ber angem aw ka ti. “Tunge?” tih hla hi an hlaah chuan a ropui ber a ni angem aw ka ti a. A theology thlenga chai tham a awm. Theology huanga ‘Christology’ lam atanga zir zau tur thlengin a awm a ni. 1994 hnu lama band ho hlaah chuan, a mimal taka ka dahsan ber a ni. He hla hi Hmingpuia (Albatross) phuah a ni a, kum 2010 ah Mamit & Ngopa tanpuina pual concert Vanapa Hall ah Albatross ten sa chhuak in mipui hriat alo ni tan ta a ni. Music hi Albatross kutchhuak vek a ni. A hla mal mal chuan chai zui lo mai ang. Hun kan ngah lo em mai.
E) Magdalene an lar em em a. Ram pawn dap nasa ber pawl an ni awm e. sap hla an ngah a. Mizo hla an nei nual tho a. A hla mal malin kan sawi thei lo ang a. A tlangpuiin, hla rua an hmang khirh lo a. Tawngkam pangngai kan tih ang an hmang tam a. Chu vangin, hla thu hman sual an ngah lo. An hlate ho hi ringtu mimal nun leh Pathian nena an inkar a tam. An sap hla sak ang em em chuan an mizo hla sakte hi a lar lo deuhin ka hria.
F) Engemaw hunlaia lar tak, Dr. Luke pawhin an hla ho hi anmahni phuah deuh vek a ni. An generation puite ang bawkin, hla thu har an hmang lem lo.
G) Anni bik hi ka han lam hlawm a. Tunlaiah pawh band active tak tak engemaw zat kan la nei a. Anni chu a hranin kan sawi tawh rih lo mai anga. Kan sawi leh turah hian, tuna band mal kan han sawi tak te leh a hming hmerha kan sawilan loh ho hlate a tlangpuia thlirna, a saptawng takin general tak a thlirna emaw, khaikhawmna emaw, pawh kan ti thei ang chu; chutiang chu kan sawi chhunzawm leh dawn a ni.
H) Band tam takin sap hla an nei a. Hei hi tun tuma kan sawi tum ber chhunga mi a ni ve lem lo a. Chutih rual chuan, a zira zirna huang chhunga Mizo writings in english kan tih ang chi kha a tihausa ve a. Hnam dangin min hriat thiam pui theih hla leh min tawmpui theih hla a ni bawk a. Sap hla anmahni phuah ngei an han sa ve thin hi a chhinchhiah tlakin ka hria.
I) Tun lai hian soloa kal tam tak pawhin mahni hla phuah an sa a. Mizo hla thu (poetical words) kan tih ang hi hman talh tum, a dika hmang si lo an tam a. Musical band kan neih ho hi chuan, dik lo baksaka hman hi an ngah vak lo. Band thenkhat hi chuan, a music an siam hmasa a. A hla thu an bel leh mai zawk a. Hei hi an hla flow a ti dik zawk bawkin ka hria. Hla a sak a sak tur chu, a thu hi uluk angai a. A chhan chu, a thu inrem dik hian, a thluk tur thui takin a hril. A thu neih hmasak chuan. A chhan chu, benga han ngaihthlaka kal zaih, titoh lo deuh hi a awm. Tunlaia hla tam tak hi a lar tho na a, daih rei lo tur a ni a. A nihna chhan chu. Hla tha tak an ni lo fo. Poetic diction kan tih mai, dik lo deuha hmanga, duh duh hla thu rem a, a hlaa a thu rem ho han chhiara chumi flow leh a thluk an siam inmil lo a ni fo. Kan Band ho hi a tlangpuiin an fakawm hlein ka hria. Thangthar band din thar ho emaw, zai lama inhmang emaw, hla phuah chho ve te pawhin hei hi hriat a tulin ka hria.
J) Band nih ve chuan mahni hla phuah ngei sak duhna a lo awm a. Tùrtu leh nawrtu em em pawh awm loa hla puitlin ang chi hi a tamin a hriat. Hla chhe tak an nei lo a. Band tam zawk hian, hla ‘stand out’, a zira zir leh a chaia a chai tham, kan nun leh khawthlir khawih thil an ngah lo.
Music lama an san avangin a thluk an nei thei mai a. A thu an rem khawm.thei maite pawh a ang fo. An hla zawng zawng ka sawina a ni lo a. A hla thahnem tak.erawh chu chutiang dinhmun atanga rawn chawr chhuak chu a ang tlat si a ni.
Hla tlo, hla daih rei chu, a thu tha, a thu dik, a thu inlalawn, a thluk mawi, music arrangement tha, harmony tha mai bakah a hring chhuaktu boruak a zir a ni ve bawk. Hna hnunhnang nei chuan hring chhuaktu boruak engemaw tak a nei thin. PB Shelley-an ‘Our swetest songs are those that tells of a saddest thought’ a lo tih angte pawh hi a nihna chen a awm. Thihna, inthenna, lunglenna te hian hla tha leh thuk tak tak a nghawng chhuak a. Wordsworth-an ‘Emotions recollected in tranquility’ a lo tih angte pawh a ni vek ang chu. Turtu leh nghawngtu nei hla hi a daih rei a, hnunhnang leh zun a nei. A hunlaia HIT a hnu a, reh ta mai a ni ve lo. Darjeeling tleirawl avanga ‘Dolma’ lo piangta te pawh kan sawi thei ang chu. Band hla studioa luh hnua ziah chawp emaw, hla thar neih vanga thut ho a, mahni instrument chan theuh a chord leh rythm siam.hnua a thu nena hla puitlin chuan, a hit hunlai a liam a, a reh zui duh fo.
Kan band hla ho hi a tha lo e kan tihna lam aiin, hla tha em em, zir leh sawi leh sakzui hlawh tur an ngah lo kan tihna a ni. Zodi hla ‘Chhaktiang kawl rawnah leng mah ila’ tih angte chu kum 50 vel hnuah pawh sak, sawi leh zir a la hlawh a. College zirlaia zir, literature huang chhunga lakluh a hlawh a nih.
Hla tha leh daih rei leh zir tham hi chu a phuahtu themthiamna bakah turtu leh nawrtu emaw, a phuahtuin hnam thil emaw, khawvel thil thleng, mihring nun philosophy a puanchhuahna te hi a ni duh. 1994 hnu lama kan band-ah hi chuan musical skills a innghat a ni mah mah a, an hlate hian chai an hlawh lo deuh niin a lang!
Hla mal pakhat, tunlai deuh hlek han sawi lan ka duh a. Mood station band hla “Kan lo hrai rui ang che” tih kha hla tha deuh a ni teh khawp a. A changah philosophy huang chhunga exintentialism an tih lam pawl deuh ruih mai an han chhawp chhuak a…Rock and roll hmangin kan lo hrai rui ang che, tiin solution min pe daih a…Anti-climactic an tih ang deuh kha a ni e. A thunawn uluk deuhin, engemaw tak chhawp chhuak se, a thluk tel lo pawha poetry tha tling thei tur hi a nia.
Kan neihchhun ka hmangaih kan ramah hian,
Sual leh tha kan teh dan hi a danglam,
Kan leng ve em, kan khawvel siamchawpah hian?
An ngaihdan leh duhdanin ngaihtuah a ti tam.
Kan neihchhun kan hmangaih kan ramah hian,
Zalen kan ni em? Zalen kan inti em?
Kan leng ve em, kan khawvel siamchawpah hian?
I lung a awi em, lungawithlak i ti em?
**O… “Rock n Roll” hmangin kan lo hrai rui ang che,
Zaleng zawng kan sawm a che u,
he “Nopui” min dawmpuia’n
Kan neihchhun kan hmangaih kan ramah hian,
I hlim em, i lawm em, nuam i ti em?
I leng ve em, kan khawvel siamchawpah hian?
I lung a awi em, lungawithlak i ti em?
Engpawhnise, band kan neih hote hi hnam thil vek a ni tih kan hriat tel angai a. Mizo min ti mizo tu an ni. Hei hi anni pawhin theihnghilh lo se, an mimal nunah te, an music siam leh hla phuahah te pawh hre tel sela. Hnam khawhar zaia awitu an nihna hi inhre tel sela, tuna an hla aia tha zawk nei turin tang leh zual sela tiin ka han sawi duh a.