Ukrainian sipaiten an ram khawchhak lam, Kharkiv region-a anmahni rûntu, Russian sipaite an nawr letnaah an tam hleih hle a, an sipai pakhat chu Ukrainian sipai pariat zelin bawr thei ang an nih hial thu heng lai hmuna Russia-in a awmtir hotu lian pakhat chuan a sawi.
Vitaly Ganchev chuan Russian TV hnenah Ukraine sipaite hian hmar lamah khua an la nual a, Russian ramri an paltlang niin a sawi.
Ukraine chuan a hmain thla ruk an indo tawh chhunga an lo chân tawh ram sq km 3,000 zet an la let leh tawh niin an lo sawi tawh bawk.
Ukrainian sipaite hian darkar 24 liam ta chhungin khaw 20 an la let hman niin an insawi a, hmarchhak lamah an nawr zui zel tih an sawi bawk.
Chhim lama Kherson region-ah pawh thapui thawh tharin sq km 500 vel an la kir niin an insawi bawk.
UK defence thuneitute chuan tun hnaia Ukrainian sipaite hlawhtlinna hian ‘Russia-in an thenawm a rûnnaa an inbuatsaih dan’ a nghawr dawt dawn niin a sawi.
Hetih lai hian Kremlin thupuangtu, Dmitry Peskov chuan Ukraine-a beihpui an thlak chu an tum an hlen hma chu a la kal zel dawn niin a sawi ve bawk.
President Vladimir Putin-a hnenah thil thleng thar apiang chu thlen zel a ni tih a sawi.
Russia hian tun hnaia Ukraine-in a chhuhsak leh hmunah beihpui an thlak thar veleh mek niin an insawi.
Thapui an thawh thar velehna zingah hian Inrinnia Ukraine-in an lo lak tawh, Izyum leh Kupiansk pawh a tel a. Russia hian a hmain inhlawm khawm tha leh turin heng khaw hnih atang hian an sipaite an inhnuhdawh thu an lo sawi tawh a ni.
An lo lak tawh sa chhuhsak an nih leh tak avang hian phuba lak nan Russia hian civil mite hmunhma pawh a chhu hmiah hmiah nia sawi pawh a awm mek.
Pathiannia missile nasa taka kah avangin heng lai bawrah hian power pek tihtawp vek a ni bawk.
Power awm loh hi Kharkiv leh Donetsk region-ah mi maktaduai telin an tuar a ni.