Ukraine chuan tun hnai lawka Russia kut atanga an lak let, Izyum daiah thlan tam tak an hmu tih an sawi.
Ukrainian sipaiten khaw dai ramhnuaiah thinga siam kraws hmanga chhinchhiah thlan tam tak an hmu a ni.
Thuneitute chuan Zirtawpni atang khan heng thlan zinga thenkhat hi an hai hawng tan tih an sawi.
Heng thlana phumte hi engvanga thi nge tih hriat theih a la ni lo va; mahse, laipuia kahnaa thi leh damdawia inenkawlna tha an nei loh vanga thi ni ngeia ngaih an ni.
Ukraine national police service hotupa chuan Zirtawpni khan ruang tam zawk hi civil mi an nih thu a sawi.
Ihor Klymenko chuan thuthar lakhawmtute hnenah sipaite phum an ni ngei tih a sawi a; mahse, an tam lo niin a sawi.
Ukraine thuneitute chuan a hmain BBC hnenah he hmunah hian ruang 400 chuang phum niin an lo hrilh tawh.
UN pawhin he khuaah hian thlithlaitu tur, monitoring team tirh theih ngei an inbeisei tih a sawi.
Mihring dikna chanvo humhalhtu pawl chuan ruangte hi endikin sipai nge civil mi an nih leh an thih chhan hriat tum a nih thu an sawi.
Izyum hi indona a chhuah tan tirha Russia-in an lak vat niin sipai hmun atan an hmang a, khawchhak lam atanga an châk lak nan bera an hman a ni.
Ningani zana thu a sawiah President Volodymyr Zelensky chuan ‘he hmunah hian rang taka chet lak a ngai’ tih a sawi.
“Khawvelin thil thleng hriat a duh a, Russian-te awpna hnuaiah eng nge thleng a hriat ang. Bucha, Mariupol, leh tunah Izyum a ni leh a, Russia hian khawiah pawh thihna an thlen a ni,” a ti a. “Tun maiah chuan a zat pawh hriat theih a ni lo,” a ti.
Ukrainian hruaitu hian an khawpui, Kyiv bula Bucha-ah mi tam tak phumna hai chhuah leh chhim lama lawngchawlhna khawpui, Russian-ten an awp reng, Mariupol bula thlan tam tak hai chhuah a sawi a ni.
President Zelensky-a pisaa hotu, Andriy Yermak chuan Ningani zan khan thlanmual an hmuh chhuah thlalak thenkhat chu Twitter-ah a tar lang a, Zirtawpni khan chiang lehzualin an hai tan.
Izyum khuaa thil dingte chu indona avangin a chhe deuh vek a, tual chhung politician pakhat chuan 80% zet an khuaa thil ding a chhiat thu leh in chim karah ruang hai chhuah fo a ni tih a sawi.
Kharkiv region-a Izyum leh khawpui dang eng emaw zat chu Ukrainian sipaiten beihpui an thlak tharnaah Russian kut atangin an chhuhsak hlawm a; Ukrainian-te hi chet dan hian Russian sipaite pawh a barakhaih avangin an inveng hman meuh lo.
Ukraine chuan February 24-a President Vladimir Putin-a thupeka a sipaiten Kyiv an rûn atangin indonaa dan bawhchhiatna (war crime) 21,000 chuang a awm tawh niin an sawi a. Heng zingah hian Russian-ten civil mi an thah leh an pawngsualte pawh a tel.
Chhuitute leh chanchinbumite pawhin Ukraine puhna hi a dikah ngaiin Bucha leh a chhehvelah civil mi eng emaw zat thah an ni tih an sawi.
International Criminal Court pawhin a chhuitu tur team a tir a, an zingah forensic lama mi thiamte pawh an tel.
Russian sorkar erawh chuan civil mi an beih loh thu an sawi nasa hle a, Ukraine leh khawthlang ramte chuan finfiahna siamchawp hmangin an puh niin an sawi.
Zirtawpni khan Russia-in a thlawp, Luhansk People’s Republic tia ram pakhat anga anmahni thua inchhal sorkara prosecutor general chu bomb puakah a thi tih Russian news agency-te chuan an sawi.
Sergei Gorenko-a hi a thachhangdawltu nen an khawpuia an pisaa bomb tihpuahah an thi nia sawi a ni.