Aizawl : Twitter-a Nilanjan tih hmingpua awmin Tamdil enkawltuin zu a ruih thu leh a hmunhma leh bungruate pawh enkawl that a nih loh thu tunkar Thawhlehni-a a tweet hnu ah nimin khan Tourism deptt-a provisional employee Boatman (IV Grade) Ṭamdil-a thawk K. Lalrohlua banna thupek tihchhuah a ni.
Tourism Deptt. Director-in nimina thupek a tihchhuahahah chuan K. Lalrohlua chuan sorkarin tih tur leh mawhphurhna a pek ang te ti lovin, zu rui chungin mikhual a dawngsawng nia tarlan a ni a. A duty na hmanruate a enkawl ṭhat loh avanga vawi tam tak insiamṭha tura hrilh a nih hnua Sorkar leh Deptt timualpho zawnga mikhual laka a khawsak leh avanga ban a nih thu tarlan a ni bawk.
Thudawnna pakhat chuan Tourism Deptt-in an ban chu Boatman, pension hnaih tawh lam nia sawiin, Tamdil leh a chhehvela thil awm leh bungraw awm te pawh hre chiang tak a nih avangin Mizo pawh hnamdang pawh riah tir lova lo hnar hram hram duh thin niin a sawi a. Riahnatlaka siam turin a ni tih theih leh thuneihna a nih loh avang leh Deptt. mualpho a hlauh avanga riah tum te chu lo hnar mai thin nia sawiin, zu lamah erawh a fihlim loh thu leh biaktlakloh khawpa rui thin erawh a nih loh thu a sawi.
Twitter lama Nilanjan intiin a tweet enin, a lungawilohna a sawi zinga pakhat, thawktu pakhat zu rui nia a sawi lakah chauh action lak chu Deptt. hmalak that tawklohnaah Boatman pakhatin a tuar ta mai nia a lan theih thu thudawnna chuan a sawi a. Nilanjan-a’n a tweet-a a lungawilohna a tarlan dang Tamdila riahna hmumhma, mutbu leh bungraw dang tha tawk lo chungchang pawh chhui chiana a mawhphurtu laka action lak ve tho chu Deptt. lamin an tih tur nia a lan thu a sawi bawk.