Aizawl : Champhai Bawrhsap James Lalrinchhana’n nimin khan Dungtlang branch YMA buatsaih Vangpui Kût vawi 36-na a hawng a. Vangpui kut hian ni thum a awh dawn a, Dungtlanga Zokhua-ah neih nin, He hunah hian Dungtlang VCP Pu Malsawmthanga chu kût thlengtu a ni.
Kut hawngtu Champhai Bawrhsap chuan mipuite Kût chibai buk in, Dungtlang lal fanu hmeltha Lianchhiari tuallenna hmun ngeia Vangpui Kût hman a ni chu inhmeh a tih thu a sawi a. Kut hlawhtlinna tura theihtawp chhuahtute a fak bawk.
Pipu sulhnu tamna Tuipuiral tlangdunga pipu sulhnu humhim tlat a tul thu sawiin, an sulhnu bakah an nun zemawite chhawmnun zel a tul thu pawh Bawrhsap chuan a sawi a. Kalkhawmte chu hmasawnna kawng dik zawh tura rualelna dik leh rilru puthmang dik nei tura chahin, mahni theuh inenfiah turin a sawm.
Zirna tha leh kalhmang dik tel lovin hmasawnna dik leh tha a awm thei lo tih sawiin, zirna in leh a vel humhima, zirtirtu leh zirlaiteah hmasawnna dik thlen tura tanlak a tul thu a sawi.
Faina chungchang pawh sawiin Champhai Bawrhsap chuan faina chu hriselna nena inngheng tlat a nih thu leh hnathawk thei tura hrisel a pawimawh hmasak thu a sawi a. Taksa, in leh a vel mai bakah rilru thlenga tih thianghlim a tul thu a sawi.
Thalaite nun tichhe mektu ruihhlo do kawngah tanrual a tul thu sawiin, Bawrhsap chuan ruihhlova inhnamhnawihte dapchhuah leh man kawnga tanhopuiah district mipuite a sawm a. District thuneitute chuan ruihhlo tawlh leh zawrh kawnga inhnamhnawih man te ngaihhnathiamna an neih dawn loh thu a sawi bawk.
Vangpui Kût chuan tualzal nun tha leh Zonun zemawi chawilar kawngah tanlak tharna thlen se a duh thu Champhai Bawrhsap chuan sawiin, “cultural day pual hian Mizo tlawmngaihna ti vul zel ang u”, tiin kalkhawmte a sawm a. Mipuite chu nungcha, thing leh maute duata mamawh bak tichereu lova humhalh tur te, dan leh hraite zirchianga tha taka zawm tur leh midangte hrilhhriat kawnga tan la turtein a chah bawk a ni.