Russia hian an rama an chhal tur ram bial pali hi a khawiah mah a pumin an la thunun lo vek a. Luhansk chu an thunun zau ber niin a ram zau zawng tam zawk an thunun a, Moscow hian Donetsk 60% vel a thunun.
Thla sarih liam taa Russian sipaiten hmar, khawchhak leh chhim lam atanga Ukraine an rûn atangin heng region pali-ah hian indona nasa tak a la awm reng a. Chhim lama region khawpui, Zaporizhzhia chu Ukraine sorkarin an thunun mek niin Kherson pawh lak let tumin an inbei nasa hle bawk.
Russian-ten thuneihna chelhtu tura an dah thuneitute chuan thla eng emaw zat kal ta atangin an rama dah turin an lo ti tawh a, Ukraine hian September thla khan nasa taka bei letin Kremlin-in a lo thunun tawh tam tak an la let.
Ukrainian sipaiute hian Ningani khan hmarchhak ram zau tak an lak belh leh niin an insawi a, Russian sipaite chu Donestk-a khawpui pawimawh tak, Lyman-ah an hual vek tawh niin an insawi.