United States President Joe Biden-a sorkar chuan a hma chiaha Donald Trump-an a lo tihtawp tawh, Palestinian-te an ramin a puihna chu a chhunzawm thar leh dawn a, inpalai tawnna lam pawh kalpui thar leh a tum.
UN-a US palai, Richard Mills chuan Security Council-ah Biden-a hian Israeli-Palestinian buaina chu chin fela ram pahnihte inngeiha awmtir chu a duhin hetiang a nih theih nana hmalakna pawh a thlawp tih a sawi.
Palestinian-te hi Trump-a sorkar nen khan an inhmu thiam lo nasa hle a, a sorkarin Israel nena inremna tur kawng a ruahman pawh Israel lam a awn lutuk nia an ngaih avangin an duh lo.
Trump-a sorkarin kum liam taa an inrem theihna tura ruahmanna a siamah chuan West Bank leh Jordan Valley-a Judate awmna hmun chu Israeli-te thuneihna hnuaia dah a tum a, Jerusalem chu ‘Israel then darh loh’ (unidivided Israel) khawpui atan dah a tum bawk.
Heng bakah hian Palestinian ram chin chu Gaza huam vekin, West Bank an tih ram 70% chuang siama an khawpui atan East Jerusalem hman turin a ruahman.
Israel hian West Bank leh East Jerusalem hi kum 1967-a Middle East indo atang khan an luah a. Ram tam zawk chuan he hmuna awm mekten an luah dan hi dan kalh niin an ngai a; mahse, Israel chuan a luah reng tho.
Security Council-a sawihonaah Mills chuan Biden-a sorkar hian Israeli sorkar leh Palestinian Authority te chu ram hnih innghirnghona tichhe zual thei – ram inluahsak, mahni ram lova chetna, tharum thawhna thlen thei, lehlam tana firfiak taka chet chhuahna ang chi chu pumpelh hram ram turin a ngen tih a sawi.
US chuan Palestinian hruaitu leh mipuite nena kum li liam ta chhunga inrem lohna lian tak awm pawh siam that a duh tih sawiin US chuan puihna lam pawh kalpui leh a tum a. Ram inpalai tawnna khar pawh hawn thar leh a tum niin Mills hian a sawi.
“Hetianga US-in a puihna tur hi Palestinian maktaduai telin dawngin Palestinian leh Israeli inkara boruak tha a awm theih nana puitu a ni ang,” a ti.
“Hetih rual hian, US hian Israel hi tha takin a thlawp zel dawn tih ka sawi chiang nghal bawk e,” tiin a sawi.
Mills-a chuan Biden-a sorkar chuan Trump-a hmalaknaa Israel leh Arab ram paliten inthian thatna an siam thar chu a lawm hle tih pawh a sawi a, “Arab-Israeli hi Israeli-Palestinian remna aiawhtu erawh a ni lo,” a ti.
UN-a US palai, Mills-an hetiang a sawi hma hian Palestinian Foreign Minister Riad al-Maliki chuan, “Trump-a sorkarin dan lo ang leh rawng taka thil a kalpui kha a inthlak kan beisei a, muanna a awm theih nana tha taka kan thawhho ka beisei,” tiin a lo sawi tawh.
US-a Israel aiawh, Gilad Erdan chuan an ram leh a chhehvela muanna tluantling a awm theih nan chuan ‘tlang taka ram pahnihte inbiakna neih a ngai’ niin a sawi a. Security Council chu Trump-a ruahmanna anga Israel be tura Palestinian-te a nawr turin a ti a, chu chu bul tanna tur a nih thu a sawi bawk.