AZL: Tunlai hian E. Lungdar leh a chhehvel Tuichangral khaw thenkhatah rannung chi khat, ketaminu a tam hle.
Thudawn danin East Lungdara Hruihzau panna kawnga motor dai khuarna sir velah ketaminu an tam hle a, a hlawmin, pan lam neiin, khaw chhung hawiin an kal niin hmututen an sawi.
Ketaminu hi khaw chhung leh huanah pawh an tam hle a, East Lungdar thenawm, Mualphengah pawh an tam hle nia thudawn a ni a. Thil tihchhiat an neih hriat a ni rih lo va, hmun thenkhatah a thi an awm khawm ruih bawk nia thudawn a ni.
Dr. HT Lalremsanga, Zoology deptt., MZU chuan ketaminu hi an puang hluai ni lovin, ruahsur avangin an tawmna lei chhungah oxygen an tlachham a, an chhuak huk niin a sawi a. Hetiang hi a awm fo nia sawiin, a hlauhawm loh thu leh an bo leh duak mai tur thu a sawi bawk.