Aizawl: Mizoram Synod hnuaia inkhawmpui lian ber dawttu, Presbytery inkhawmpui chu October 6-9, 2022 chhungin Mizoram hmun hrang hrangah neih a ni a, Champhai North Presbytery inkhawmpuiin sacramental wine atana Mizorama kuthnathawktute thar, grape rah atanga siam, grape wine hman an rawtna chu rorelna sang zawk Synod-a kal zel turin an pawm.
Champhai Vengthlang Kohhran Biak In-a Champhai North Presbytery inkhawmpui vawi 17-naah hian pastor bial pahnih atanga lut, sacramental wine atana Mizoram thar grape atanga siam grape wine hman rawtna a lut a, inkhawmpui hian Mizoram Presbyterian Kohhran rorelna sang ber, Synod-a kal zel turin an pawm a ni.
Presbytery inkhawmpui hrang hrangah hian rorelnaah ram siam thatna lam hawi leh kohhran inrelbawlna thila rawtna hrang hrang lutte ngaihtuah a ni.
Hmarthlang Presbytery vawi 79-na, Bilkhawthlir Hmarveng Kohhran Biak Ina neihah kum 2023 MLA inthlan lo awm turah inthlanna felfai a awm theihna turin Synod-in ram pum huap revival beihpui ruahman leh rawh se tih chu pawm a ni.
Presbytery hrang hrang inkhawmpuiah hian kar kalta Ningani chhun khan nomination committee, finance committee leh sub-pastoral committee te an thutkhawm bakah kohhran upa thlan tharte exam buatsaih a ni a, zan lamah vantlang Pathian biak inkhawmah palai lawmna leh pastor bial report ngaihthlak a ni.
Zirtawpni leh Inrinni chhunah rorelin zan lamah vantlang Pathian biak inkhawm neih thin a ni.
Nimin chawhma khan upa nemngheh inkhawm neih niin chawhnuah Lalpa Zanriah Sakramen leh upa thite sunna hun hmangin, zanah Presbytery Moderator kal chhuakten inthlahna pualin thuchah an sawi a, inkhawmpui a tiak a ni.