- Mahmuaka Chhakchhuak
Sept. 21 – 24, 2022 chhung khan Aizawl Millennium Centre-ah International Art Exhibition neih a ni a, hetiang taka ropui leh mipuiin an hlut Exhibition hi Mizoramah ala awm ngai kher awm lo e. A buatsaihtu Lalhming Mawii (Amawii) inbuatsaihna a ropuiin a chhuanawm hle a ni. He Exhibition hi Pu Lal Thanhawla (Ex- Chief Minister of Mizoram) in a hawng. He Exhibition hi Khawvel ram hrang hrang 37 atanga Lemziak thiamte leh Lem kher hmanga buatsaih a ni a, Mizoram chhung leh India ram chhung hmun hrang hrang bakah India ram pawn atangin mi 50 an rawn tel a ni.
He International Art Exhibition hi a hmingah – Love Revolution An International Art Exhibition tih deuh kher a ni a, ram hrang hrang 37 atangin Artists hrang hrangte chuan he hunah hian an kutthemthiam an rawn pho chhuak a, New York atangin Michael Lam Vision Art-in he Exhibition hi support an rawn pe bawk a ni. Mahni insengsoa rawn kal engemawzat an awm bawkin Nargish Soma, Bangladesh pawh mahni insengsoa rawn kal a ni a, Mumbai atanga mahni insengsoa rawn kal ve bawk Sunil Deore lemker, Ashoka Pillar thar lem ker phei chu Nuaih khat leh Sing khat laia hralh a ni. He Exhibition hi ngai hlutu an thahnem hle a, en tu pawh an tam thin hle a ni. A vaiin Items 184 pho chhuah a ni a, Rawng hmanga lem ziak 52, Thlalak 10, Lem kher 9, Computer hmanga lemziak 118 te a ni. heng thil chi hrang hrangte hi mit la tak tak an ni hlawm a, Tahan atanga rawn tel C. Lalawmpuia (C. Puia) ziak Aung San Suh Kyii lem chu thlir a hlawh hle a. Mizo zinga lemziah lama sul lo sutu Rev. Stephan Rotluanga, Tlangrokhuma, Lalbuta, Lalbiaklara leh midangte kuthnu pawh hmuh tur a awm bawk.
Hetiang Art Exhibition hi tum engemawzat lo neih thin ni tawh mahsela tun tum ang renga mipui hlut hi chu a tam kherin a rinawm loh. A hmuna kal ve ni chiah lo mah ila, ka thiante kalin kal manhla an tih zia an sawi atang hian a boruak tur chu engemaw chen a hriat theih awm e. Ka thianpa Tluanga Chhakchhuak chuan heti hian Exhibition-a a kal chanchin a sawi a – Mizo lemziak thiam Lalhming Mawii (Amawii) buatsaih a ni a, khawvel ram 37 atangin lemziakthiam Artist (ပန်းချီ) leh lim kherthiam Sculptor (ပန်းပု) 122 an tel a, India ram pawn lam atangin Artist mi 50 pawh an tel a, an lemziak phochhuah zingah ka nau C. Lalawmpuithanga (C. Puia) kutchhuak Democracy Icon Aung San Suh Kyii lem chu ngaihhlut a hlawh hle. Tlawhtu an tam hle a, thalai leh zirlai an tam lehzual. Tlawhtute zingah Sikkim atanga lo kal ka hmu a, C. Puia lemziak ASSK painting uluk taka a en lai chuan he hmeichhia hi i hria em tiin ka zawt a, “Why not, I know very well her. She is Democracy freedom fighter in Burma” tiin rang deuh in min chhang a ni. C. Puia hian a kutchhuak painting pahnih a rawn dah ve a, India leh khawvel ramdang lemziak thiamte lemziak zinga a ziah a tel avangin ka lawmpui tak meuh meuh a ni. Art/ Painting-a kan san dan a zirin kan hnam hi hnam dang zingah a tha zawngin kan thangchho ve zel dawn a ni.
Amawii hian Love Revolution Art Exhibition tiin hming a chawi tir a, Khawvel leh India ram chhunga lar pha leh Mizo senior Artist thiam tak tak lemziak lama sulsutu, The most Rev Stephen Rotluanga, Pute Tlangrokhuma, Lalbuta, Lalbiaklara leh midangte kutchhuak zinga Artist Junior tak C. Puia lemziak ka hmu thei hi ka chhuang hle mai. Mizoram lem ziak thiam zingah International standard nei, mi duai lo tak tak an lo chhuak tawh a, lemziah hi Mizote chem kal zawng tak a ni. Kan lemziak thiamte hi kan fakin kan chawimawi hian an tan phurna kan siam thei dawn a, an thawh rimna hi Mizo mipuite hlawhtlinna a ni. Ka ngaihsan em em Artist Pu Tlang Rokhuma hian Myanmar rambuai portrait painting kan ti dawn nge, Myanmar Rambuai Historical Contemporary Zozeh Art painting tih chu ka sawifiah thiam chiah lova, kum khat chhung vel a lo kalpui tawh a, Myanmar rambuai Literature-te nen a hlawm a mipui hmuh theih tura phochhuah hun ka nghakhlel hle mai tiin.
Pu Hriata Chhangte pawhin he Exhibition-a painting pakhat a lei chu chhuang takin heti hian a sawi bawk a – Picture hi i en chuan Mizoram Map pianzia angin kawngchhe lai hi draw a ni a. CM Car chu Minister/ MLA rualin an zui hmasa phawt a, chung ho hnungah chuan Officer lal tak tak hoin an rawn zui leh a. Mipuite thlan lal hote ngei chuan anmahni thlang laltu mipuite chu an motor changkang tak tak chuan diak an lo chil per leh lawi si hi a lo ni.
Uluk lehzuala i en chuan Dikna, Rorelna Dik tih ang rengte chu kawngsirah diak chim chhiat mekin an tlu bal tawh mai. An tlukna pawh a rei tawh hmel khawp mai. Chutah kawngsir thing kung sang tha tak, hrisel leh thang duang hmel te i en chuan CORRUPTION kungte, SMUGLING kungte an ni hlawm. Chung thingkungte chu Kuhva kung an lo la ni hlawm zui. Han thlek thui deuh hlek la, hla takah chuan Mizoram khawpui ber ZAWLKHAWPUI chu a lo inrem khir un mai bawk a. Amaherawhchu vanduaithlak takin Zawlkhawpui hmelhmang pawh chu bih chian hleih theih loh khawpin alo lang chiang thei tawh lo hi a ni a. Aizawl khawpui chu chhun engah chuan tawphnawk rem khawm khir un mai, sap tawnga ‘Concrete Jungle’ tih mai tur hi alo ni satliah ngawt mai si tiin.
He lem ziaktu RC. Sailo ngei pawhin he lem a ziak chhan chu ‘Kum tam tak kal tawh atangin kan ramah hian Politics kan lo kalpui dan hi a dik tawh lo a, kan thlan lalte ngeiin min zah loh dan hi kawng tam tak sawi tur kan hre hlawm ang, chuvangin vawiin thlenga hetiang hi kan kalphung a nih avangin kan ram dinhmun hriat theihna turin heti hian lemziak hmangin kan han tarlang a ni’ tiin a sawi.
Hetiang hian kawng hrang hrangin lemziakin thil ala lantir theih zia chu kan hrethiam theuh awm e. A then chu Politics rawngkai a ni ang a, a then chu portrait lam hawi a ni ang a, a then chu nature lam hawi emaw thu leh hla lam hawi pawh a ni ang. Chung zawng zawng chu a ziaktu thinlunga thawktuin a thawh dan dan a ni mai. Mizo zinga lemziak lama sulhnu ngah tawh tak Pu Tlang Rokhuma chuan heti hian he Art Exhibition hi a hmuh dan a sawi bawk a – CoviD hripui leng avangin kum hnih emaw kan han chawl hlek a, kuminah Amawii’n a han buatsaih thei hi lawmawm ka ti hle. Hetiang hi tawngtaw buatsaih theih mai a ni lo a, sum leh pai a ngai a, mipui hlut leh ngainat theih tura inbuatsaih a ngaih bawk avangin mut mawh hnar mawha neih a ngai tak meuh a ni. Tuna Exhibition buatsaih hi mipui pawhin an hlut viau mai a, lemziak hmanga thil chi hrang hrang kan lantir thin hi thil zawngchhang tlak tak a ni tiin a sawi bawk. Kum tam tak kal tawh atang khan kan Chief Minister hlui Pu Lal Thanhawla khan lemziak lama tui mite min duhsak thin a, a zarah hmasawnna tam tak kan lo nei tawh thin bawk a ni a ti.
Mizo zinga lemziak thiam kan neihte hi mi chi hrang hrang, kum upa deuhte, kum naupang deuhte leh hmeichhiate pawh an ni hlawm a, chu chuan tu tan pawh lemziak hi a tih theih vek tih a lantir kan ti nghal thei ang. Tuna Art Exhibition kan sawi mekah ngei pawh hian mipui mit fukna ber pakhat chu kum naupang takin a ziak a ni. Sawi hmaih chi rual loh chu buatsaihtu Amawii’n hi VIPAA, New York atanga chawimawina a dawn theih atang hian Mizo tan ngei pawh lemziak hi kan thiam zawng leh khawvela kan inphochhuahna tha tak a nih zia pawh kan hre thei bawk ang. Amawii hi INTACH lamah kan thawhpui a ni a, hetiang taka talent a neih that avang hian leh hlawhtling taka Exhibition a buatsaih theih avang hian thinlung takin kan lawmpui a ni.