- F. Vanlalrochana
HOME TRUTH FOR CAREER WIVES
(Hei hi Chetan Bhagat-a thuziak ka lehlin a ni)
Hmanni deuh lawka Cocktail 2012 tih film ka en kha ka rilruah a awm deuh reng mai. A changtupa khan Hmeichhe hmeltha tak pahnih atangin a duh zawk a thlan kha a ngai a. A film kha London-ah a innghat a. A changtupa leh changtunu pakhat chu Night club-ah an intawng a, zu an in dun a, an mu dun nghe nghe! Tun lai khawvela hna duhawm tak mai glamour photography, graphic art leh software design kaihhnawiha hnathawk an ni. Mahse, a tawpah chuan a changtupa chuan hmeichhe rawngbawl thiam, incheina pawh uluk khip khep tak, chhungpuinu niha ina awm thlang, a nu ti lawmtu zawk chu nupuiah a nei ta a ni. A hnawl tak zawk, Nula ‘independent’ tak mai leh zalen haih mai pawh khan amah a neih theihna a nih dawn chuan insiam rem a hreh bik lo a, ei rawngbawla “Indian chhungkuaa mo tha” ni tura insiam rem a hreh biklo a ni.
A movie kha a en a nawm viau rualin ka ngaihtuahna a ti buai ang reng bawk. Hmeichhe hlawhtling leh rintlakte chu an pasal te tana ‘Dal’ leh ‘Roti’ siama ‘’Damna” hmu anga kan lan tir chuan kan fanu naupang te te hnenah hian eng ang India nge kan lan tir le!
Pasal te ei tur tui tak siam sak leh a chheh vel ngawt mai chu hmeichhe nun a ni dawn em ni? Mi tam tak chuan I lo buaina tur a awm lo an ti ngei ang le! Bollywood movie pakhat kha a ni ve mai a. A film siam tuten an duh ang zawng thawnthu tarlan theihna kha an nei bawk a lawm le.
Chutih rual chuan kan film tun lai ber ber te pawhin a zim zawnga thil an tarlan zel chuan, kan hmeichhia tan a dik bik lo a ni. Heti ang ngaihdan hi a awm reng tih kan hre chiang bawk a.Indian mipa tam zawk. Lehkhathiampui pui pawh hian, hmeichhia hi then hnihin an then phawk a ni- Ngaihzawn chi leh Nupui chi tiin . Hmeichhe awm dan tur ang nia kan hriat loha hmeichhe awm kan en dan hi a danglam em em mai a ni.
Khawvel hmun dang hi han thlir ve thung ila. Company langsar berte zinga mi Yahoo chuan 2012 khan hmeichhe CEO an ruai a, a hming chu Marissa Mayer a ni. An rawih tirh khan nau thlaruk mi a pai mek tawh a, a hna atana an lak dawna interview naah pawh a zep chuang bawk hek lo. A fa lo pian lai hian hun enge maw chen chu chawlh a la a, a hnuah chuan tha takin a hna a zawm ve leh mai. A fa tha takin a en kawl thei a, a hnaah pawh a thawk tha hle bawk a ni. New York Times-in a tarlan danin kum 2014 zinga hmeichhe CEO zinga hlawh hnem ber a ni. Marissa I hmeichhia te tan chauh niloin, Mipate tan pawh a entawn tlak a ni.
Indian Mipate pawh hian an kawppui tur an thlan kawngah hian rilru zau tak pu sela, “Hmeichhe Duhthusam” an tihah pawh an tehna te chu ennnawn leh ka duh a ni. Vantlangin Nupui awm dan tur anga a lo ngaihsa ang chi NUpui, rawngbawl tur, insu tur leh thuawih tawp mai chu a tha lo a ni hauh lo. Chutih rual chuan, hmeichhe theihna sang tak, mahni kea ding leh hna mumal tak thawk nupuia tana thlan pawh a thatna tam tak a awm a ni. Hmeichhe hnathawh mumal nei chuan, ‘Housewife’ ringawt ai chuan thil ruahman leh tih felah a awmzia a nei zawk thei a, nupui office boruak hrethiam ve chin I neih chuan I hnaah thurawn pawh a pe thei ang che.
A dang lehah chuan, hmeichhe hnathawk chuan chhungkaw sum lakluhna kawng a siam belh a. Tun lai khawvela thil man sang tual tual mai leh khawsak hautak tak maiah hian nunphung pangaia in nun theihnan mi tangkai tak a ni thei ang.
Chubakah, hmeichhe hnathawkin khawvel a hmu zauin a hmachhawn tam zawk a. Hriatna leh tawnhriat, chhungkaw tana tangkai tur a neih belh bawk thin.
Tin, hmeichhe hnathawk fate chuan mahni kea din a zir hma zawk thei bawk.
Hmeichhe hnathawk chuan an hnaah te tleina an lo hmuh belh thei bawk a, in chhung khur mai bakah. Nunah pawh kim zawka inhriatna an lo neiin, Pasal teah an innghat pumhlum lo zawk bawk dawn a ni. Chu chuan, Nupa nun hlim zawk leh inngeih zawk a siam thei a ni, Heng zawng zawnngte a taka a thlenna tur erawh chuan, Mipa te hian an in tih “PA” na em em mai hi paihin, hmeichhia te hi an tlukpuiah an ngai tur a ni.
Hmeichhe hnathawk nupuia neih hian thatlohna chu a nei ve teh reng mai, Chutih rual erawh chuan, ei rawngbawl tur ringawt mai nupui kan zawng a nih chuan, hmeichhiaa thatna awm kan chan tur tam tak kha kan hloh ve thei bawk a ni. Heng zawng zawng te hi, hmeichhia an incheina, chokaa an thiam thil leh an tawngkama an inrin tawkna lo lang atanga I teh ngawt hmain ngaihtuah hmasa ang che.
Ka nu hi kum 40 chhung hna a thawk a, Ka nupui hi International Bank-ah Chief operating officer a ni a, ka intih theih phah em em mai. Ei rawng a bawl ngai lem lo, a ti tur mi dang kan ruai mai a ni. Chu chuan ka ngaihtuahna a ti buai lem lo, chokaah a nun hmang ral se, ka ngaihtuahna a buai zawk ang.
I kawppui tur uluk takin thlang ang che. Kan hmeichhe hlawhtling te hi en liam mai lo la, pawm la , chawimawi ang che. Kan chhungkua hmasawnna an thlen a, ram an ti changkang a ni. Chaw tui tak kan ei lo a nih pawhin, hnam tha zawk kan ni ang.
PU THANGKUNGA SIKUL
Ruantlang Primary School 1-ah ka lut thin a. Chu chu Mualvenga awm a ni a. Zirna in ropui tak a ni lo. Ka ngai thin hle thung.
Primary School-1 ti ang khan kan sawi ngai lo a. Sikul hotupa hmingin sikul kha kan sawi mai thin a. Ruantlang Primary School-1 pawh Pu Thangkunga sikul kan ti mai thin. Thil tam tak chu chuan a sawiin ka hria.
Kan Zirtirtute kha lehkhathiam sang ber ber an ni lo a. Theihtawp erawh an chhuah ve thin. Zirtirtu Pali chauh kha kan nei thin a, Upa Thangkunga, Pi C Chawngpuii, Upa Malsawma leh Upa K. Khuangluaia. A hnuah Pu Zaneihthanga kha a rawn zawm ve a. Pawl 3 kan ni tawh a. “Zirtirtu thar kan nei” an tia, kan va en luih luih a. A hmelchhe reuh lutuk, te kha kan ti a!
Min zirtirtute kha mi fing ber ber an ni lo a. Thingtlang khuaa zirtirtu kha an ni ve mai a. Mahse, Min hmangaih. An phak ang tawk tawk khan, khawvel hi hria se min duh ve thin a. Pu Thangkunga khan, Abbreviation hrang hrang te kha a rawn ziak tlar dal a. USA kha United South America a rawn ti palh hlauh a. “Ka pu a dik em ni?” kan ti a. JF-a Dictionary tawp kha a han en a, a siam tha leh ta a. Kan ngaihsanna a reh phah chuang lo.
Pu Thangkunga lemziak thiam a ni a. A kutziak a mawi em em bawk. Kan ngaisang thin hle. Pu Khuangluaia khan, Sap Tawng leh Pawih tawng ngatin thute kha a han puang thin a.
Pu Thangkunga nupui kha Pi Roi ni tain ka hria. Ka va ngaithin tak! Examnaah pakhatna ka nih thin avangin, Cheng 20 kha, exam result chhuah a piangin min pe thin! Bial Hmeichhe Commitee an rawn commitee te khan a bulah min thuttir a, examnaa tih that hlutna te kha min hrilh thin a.Pi Roii kha hna thawh a neih ka hre lo a. Mahse, zirna kha a ngai hlu em em mai a. A fateah pawh Ngurliana kha MA a ni a. Middle School headmaster a ni a. A fapa pakhat Pazawna kha, U Pazawna kan ti thin a. Ani pawh khan min duat thin hle. Mualveng Kohhran Zaipawl hla zir tur kha Bial Centenary Hall-ah an rawn her thin a. An hla her lai khan a bulah min awm tir thin! Kolasib lamah hna thawkin a awm tain ka hria.
Pu Malsawma khan Solfa min zirtir thin a. Khata tang khan Solfa ka thiam phah a. Solfa vaite kha kan han tui thin khawp a. Pi Chawngpuii’n Thawnthu min hrilh laite kha ka mitthlaah a la lang reng mai!
Sikul kawtzawlah khan kan inkhel thin a. Ngal bawtin kan ti a.Ngal kha a khem nian nuan thin! Kan sikul hnungah khan sertawk kung a awm a. Kan lawn luai luai thin a. A lawn ve theilo nih kha zahthlak a ni thin. sikul hnung chu kham a ni a. Sikul kal e tilo khan tawlh pahrit kan tawlh chiam thin!
Sikul tlanboin Pu Sena Tuikhuahah khan kan cheng thin a. Tum khat pawh chawlh lawk laiin kan zu cheng a. kan let chhoh leh chuan, sikul an lo bang tawh a. Kan ipte kha pawnah an lo dah dal a!
Marble perh leh rubber chhemchhuah te kha sikul chawlh lawk laia kan khelh nasat avangin hmui leh kut a chat nasa thin. Kan kabbadi khelh thin avang khan, uniform kawr kha a thler duh thin hle!
Pawl khat kan nih lai khan, Vanlalmawia lian deuh tawh hi a awm a. A ni khan, min duat thin khawp a. An inah te min hruai a. Chaw thing te a kang a. Thingpui te kan in thin a. Lemziah a thiam a. Jeep lem te min ziah sak thin!
Ka classmate zingah khan kum 16 a upa te pawh an awm a. Rulngan a that a. A awrh zuar mai a. Ka mitthla hian a la hmu reng mai. Khang hunlai te kha a lo rei ve ta! Sawi tur a tam hle mai. Kan la sawi zawm leh ang chu. Upa Khuangluaia te, Upa Thangkunga te pawhin Hmun nuam zawkah min lawi san ta a! min duat em em thintu, Pakhatna ka ni lai hmuh nuam ti a, lehkhathiam se min ti thintu Pi Ro-i ngei pawh kha a lo thi tawh a. Ruantlang kan chhuahsan atangin kum 25 a liam tawh a. Vawi khat mah ka hmu leh tawh lo a! A ni pawh a thi tawh tih ka hriat khan ka lung a leng em a, heng thute hi ka ziak ta a ni.
Thisena inzawmna kan nei miah lo a, mahse, lehkhathiam se, pakhatna ni ila tiin min duhsak thintu Pi Ro-i kha a ngaihawm thin mange.