Prime Minister Narendra Modi chuan India khawthlang lam, Gujarat-a Morbi district-a lei chima mi za chuang an thihna hmun chu a tlawh a, he chhiatna thleng hi kum tam tak chhunga chhiatna lian ber a tling.
British-hovin India an awp laia dawh tawh lei, Machchu lui chunga mi hi Pathianni zan thim hlim khan a chim a, a hma ni lawkin chei that hnuah hawn leh tan a ni.
Thawhlehni thleng khan luiah hian chin hriat loh zawn leh chhanchhuah hna thawh a la ni.
Lei enkawltu firm-a thawkte telin mi pakua man an ni tawh.
Metre 230 (754ft)-a sei, Machchu lui chunga lei hi British-ho rorel lai, kum zabi 19-na laia dawh tawh kha a ni.
State tourism website-in a tar lan dan chuan he lei hi tual chhung khualzinte hiptu tha tak niin ‘a dawh dan hmang leh thiamna an hman’ chu mi tlawh tichâktu a ni a. Chet that hna thawh a nih avanga thla eng emaw zat khar a nih hnuah kar hmasa mai khan zawh theih tura hawn leh chauh a ni.
Pathianni tlai dar 6:40 vela a chim lai hian leiah hian mi za tel an awm nia sawi a ni.
Thil thleng hmutute chuan a chim hnuah khan mi tam tak chu a lei themah inuai tangin chhanchhuaktu tur an nghak niin an sawi.
Mi thenkhat chuan lui kama inhleuh kai an tum a, tam tak an inhleuh kai nghe nghe a; mahse, tui luang chak takin mi tam tak a len a ni.
Police chuan Thawhtanni khan mi 141 vel an thih thu an sawi a, a hmaa 135 chu an tipung leh a, an tihpun chhan erawh hriat a ni lo.
Thuneitute chuan thi zinga a tam zawk hi hmeichhia, naupang leh upa lam an nih thu an sawi.
Thawhtanni khan disaster response team leh India sipaite chuan lawngleng hmangin luiah mi an zawng a, hnim tona lai leh mangrove tona lai, chirh dum hmunte an hai a. Tual chhung mi tam tak bakah an chhungte bo tam takin an zawnpui bawk.
Tlai lamah khan ruang 134 an hmu chhuak a. Zanah zawn hna hi chawlhsanin Thawhlehni tukah an chhunzawm leh a, rescuer team hian hma takah a hmun hi an thleng leh a ni.
Mi 170 vel chhanchhuah an ni a. A hmuna awm police hotute chuan chin hriat lohva awmte an hmuh kim hma chu an zawng zel phawt dawn tih an sawi.
Chhiatna thlenna, Gujarat hi Modi-a chawr chhuahna leh chief minister pawh a lo ni tawhna a ni a, chhiatna thleng chuan ‘a thinlung a tihnat tak zet thu’ a sawi tawh a. State sorkar chuan Nilaini hi thite sunna hun atan a puang tawh bawk.
Prime minister-in chhiatna thlenna hmun a tlawhnaah hian Gujarat Chief Minister Bhupendra Patel-a’n a tawiawm.