Central hotu an lo zin tam
Tunlai hian kan ramah India ram hruaitu mi pawimawh tak takin kan ram an rawn tlawh zing hle. Niminah India President a lo zin a. A hma in union minister te an lo zin sup sup a. District changkang lo nia ngaih Mamit leh Lawngtlai lam phei chu an hrut ngun viau mai. Mi pawimawh buaipui reng rengin kan sawrkar hnathawkte pawh an phi buai zing hle.
Mahse lo zin tam hle e ti lo in kan ram tana hnemhnanna thil lian tham an rawn puan engmah mipui hian ka hre lem lova. Buai takin an lo zin a, an haw leh a ni deuh ber. Minister lo zin thenkhat phei hi chuan kan sawrkar an rawn sawisel emaw tih lek lek turin tawngkam eng eng emaw an hnutchhiah a. Hmanni a agri minister lo zin phei kha chuan Selesih a a thusawiah khan central in kuthnathawktute tana ruahmanna a siam dawng in awm tawh em, a dawng in awm chuan ban han phar teh u a tih khan ban phar an awm lo a. Minister kha a hawihai hle niin a lang. A bula thu kan agri minister hnena lo zawt chiang zui turin kuthnathawktute a chah ta ringwt mai a. Project lian engmah an rawn sawi ngai lova. Kan state sawrkar chevel an rawn thlithlai emaw tih zawk hial tur a ni a. Kan state sawrkar hnathawh fakna ri phei chu an sawi miah lo a tih theih hial ang.
Central sawrkarah hian kan sawrkar neih mek MNF leh BJP te hi thawk dun an ni a. NEDA ah an inzawmkhawm a. Mahse union minister lo zinteah hian thawhhona pawh a lang lem lo khawp mai. Tuna a lan dan hi chuan MNF party sawrkar hi an fa hrawn en em ni a tih theih hial ang. Kan minister thenkhat Delhi lam zin lah hian tunhnai hian engmah an zu pawchhuak lem lo ni ngei tur a ni, an ngawi hmak zel mai bawk si.
Kan state in sum leh paiah harsatna nasa tak kan tawk mek a. Sawrkar hnathawk ten thla thar hnuah rei tak nghakin hlawh an la thei tawk thin a. Hlawh lak tlai chu ngaiah an nei tan tawh a. Hlawh la theia an awm chu lawmawm an ti tawh mai ni berin a lang a. Lak tur neih loh hun an la neih mai a hlauhawm hle. Hotute loan lak tur hahipin kan sawi ta!
Kan hotute lahin sawi tur an van tawlh tawlh a. Retheihna erawhin min chim sang zel a. Kan dinhmun hi ngaihtuah chian a ngai khawp mai. Kan hotute thawhpui ten an thawhpui ve si loh chuan puih loha che thei hauh lo state tan bei a dawng tan ta. Kan hotupa vuakdup sa kha a lo sak leh zo ta anih phei chuan retheihna chuan kan nghawng thleng a chim lai hian mipui retheiin kan thaw a ipik tak zet. Kan hotute hian kan ram mipui dinhmun hrechiangin hma han la leh hram hram se. Central lam sum bawm haihawng zawng hian ke han peh leh hram se tih hi mipui zangkhaina a ni ngei ang.