Engnge midterm chu, tute nge an thlan chhuah thin?
Term laklawha inthlan hi Congress member tur thlanna a ni a, an ram rorelna in pahnih, House of Representatives leh Senate-a thu tur an thlang dawn tihna a ni.
Congress member tur hi kum hnih dan zelah an thlang thin a, president thlan ruala an thlan thin bakah an kum li term laklawh laia an thlan hi midterm tiin an sawi thin.
Congress hi ram pum huapa hman tur dan siamtu a ni a House hian eng dan nge pawm tur tih a lo thlifim a, Senate hian chung dan chu a lo dangin a lo nemnghet thin a, president-in tih tur a tihte lo pawmpuitu a ni a, president ngei pawh chhui thei a ni a; mahse, hetiang hi chu a thleng khât hle.
State 50 an nei a, state tinin senator pahnih zel neiin kum ruk term a ni a. Representative erawh kum hnih term niin state neih zat a inang lo va, state chhunga district bialtu an ni.
Tun tumah hian House of Representatives member tur a vaiin an thlang rual dawn a, Senate member tur hmun thuma thena hmun khat an thlang dawn bawk.
State lian thenkhatin an governor tur leh tual chhung rorel khawla mi tur an thlang dawn bawk.
Tute nge chak dawn?
Kum hnih liam ta chhung khan House leh Senate-ah hian Democratic Party chu member ngah zawk an ni a. Hei hi President Biden-a pawhin a dan siam duhte awlsam zawka kaltlangpui nan a hmang tangkai hle.
Democrat-te hian Republican-te aia an tam zawkna hi a chhe hle a, inthlan tur hian ngaihven a hlawh phah a. Ngaihdan laknaah chuan Republican-ten House hi an tam hneh tawh zawk dawn a, Senate erawh Democrat-ten an la thunun zui dawn tho niin a lang mek.
House-a seat 435 awm zinga a tam zawk fe chu party pahnih hian an ta neih hle a, 30 vel inchuh nat zual a awm mek a. Pennsylvania, California, Ohio leh North Carolina state-a khawpui leh an chhehvelah chak zawk tur hriat a har zual a, campaign pawh an bei nasa.
Senate bikah hian seat 35 thlan turah pali chu chak tur chiang lo zual an ni a. Hengte hi Nevada, Arizona, Georgia leh Pennsylvania te an ni.
Hmun dang pawh inbeih tawkna a awm nual a, result kimchang a chhuah hun chauhva thil chiang tur a awm nual.
Campaign auhla
Kum 2022 kum bul atangin an rama pem lut tam lutuk, pawikhawihna leh khawsak man sang chak lutuk chu titi a tling a; hengte hi Republican-te auhla leh voter-ten an lam an hawi chhan lian tak a ni.
June thlaah khan thil inthlak lian tak awmin US Supreme Court chuan nau tihtlak phalna a pawm a, hei hian Democrat-te a tichak thar ve thung a, anni hi hmeichhiaten duhthlan theihna chanvo an neih duhtu an ni.
Republican-te erawh chuan hei hi sawi lang duh lovin thil man to, pem lut tam leh tharum thawhna tam lutuk chu nasa taka aupuiin sorkar lai beih nan an hmang thung.
Result-in a nghawng theih
Midterm hi president tanglaiin eng ang chiahin nge hna a thawh tih mipuiin an bukna result anga ngaih a ni a, White House luah mektu party-in seat an hloh danin an dinhmun a hrilh thin.
President Biden-a tan a pawimawh zual a, nikum August atang khan mipuiin amah an ngainatna hi 50% aia tlemah a tla tawh a ni.
Democrat-ten ro an rel chhunzawm leh a nih chuan President Biden-a hian tih tura a ruahman – climate change, healthcare programme, abortion right leh silai thunun leh a dangte chu awlsam takin a kaltlangpui thei dawn tihna a ni.
Republican-in khawi rorelna in zawk zawkah emaw pawh an tam hneh ta zawk a nih erawh chuan a tih tum tam tak chu an lo danchahsak thei dawn tawh tihna a ni.
Hei mai a ni lo va, investigatory committee-te an thunun thei dawn a, President Donald Trump-a thlawptuten January 6, 2021-a US Capitol an luhchilhna chhuina pawh an titawp daih thei dawn tihna a ni.
Thil dang, anmahni ngaihven zawng chhui an tithar thei thung dawn a, Biden-a fapain Chinese sumdawng a dawr dan te, hmanhmawh taka Afghanistan atanga US sipai inhnuhdawh chhan leh thil dang dang pawh an duh chuan an chhui thei dawn a ni.
Biden-a tan chet a harsa dawn a, chanvo siam thar a harsa dawn a, heng zingah hian US Supreme Court thleng a huam dawn a. Republican-ten rorelna in an thunun miau chuan ram dang nena an inkungkaihna a kalpui dan pawh a nghawng dawn a, Ukraine a tanpui dan pawh tihdanglam thei a ni ang.
Hetih rual hian President Biden-a hian ama thuneihna (veto) hmangin nau tihtlak, pem lut tam leh chhiah kaihhnawihte chu a dang thei dawn tho va; mahse, chutiang chu hman a ni ngai meuh si lo.
Inthlan result hi president leh congress inthlan leh hriltu lian tak a ni dawn tih a chiang em em a ni.
President chuh tum tichiang theitu tur?
Midterm hi kum 2024-a president thlan tura Republican-in tute an dintir dawn tih tilangtu tur a ni thei dawn.
Trump-a’n tun tuma nasa taka a campaign-puite an chet that loh chuan Republican party tan president a chuh theihna remchang a tlem sawt dawn tihna a ni a. Hetih lai hian Florida leh Texas-a Republican governor pahnih, Ron DeSantis leh Greg Abbott te an tling leh a nih chuan White House luah tura chuh an hnaih lehzual dawn tihna a ni.
Democrat-ten Michigan, Wisconsin leh Pennsylvania-ah thuneihna an chang leh a nih hlauh chuan kum 2024 inthlan atan President Biden-a thlan nawn leh theihna chance a sang sawt a tih theih ang.