- Tluanga Chhakchhuak
Mahmuaka Chhakchhuak ziah HRINGNUN HI tih lehkhabu hi vawiin ni 22.11.2022 khan Aizawl MJA Press Club-ah tlangzarh a ni.
Lehkhabu tlangzarhna inkhawm hi Prof.Dr.J.V hluna’n a kaihruai a, Hon’ble MLA Pu Lalrindika’n Mahmuaka Chhakchhuak lehkhabu HRINGNUN tih chu a tlangzarh a, Zoram khawvela ziaktu lar Pu PL.Liandinga’n lehkhabu fakselna kan ti dawn nge sap tawng takin Book Review hun a hmang a , an in ngamtlak bawk a , a lehkhabu buatsaih chu fak pah bawk si , sawisel kai laite a phawrh chhuak thiam a , a lepse hneh khawp mai.
Zorama ziaktu lar an rawn fuan khawm nual a, fb milar Pu Hriata Chhangte, Mizoram Chief Secretary thin Pu Haukhuma Hauzel IAS (Rtd) leh Prof.Lallianchhunga pawh in Book release functionah thu an sawi a ni.
Ka thianpa Mahmuaka Chhakchhuak hi Dr.Vungtea ziak Kristiante leh Politics tih tlangzarhnaah hian a khuhhawnna thu min lo sawisak tawh a , amah hi Chanchinbu hrang hrang, Vanglaini ,Aizawl Post leh Zozam Times bakah chanchinbu hrang hrangah ni karthlak deuh thawin article a ziak thin a , ram leh hnam , khawtlang leh kohhran vei tak niin chutiang lam hawi thuziak hi zofate chhiar turin a chhawp chhuak fo thin a, a thuziakte chu tha ka tih em avangin chanchinbu atangin , ka chepthla in ka dah khawl hial thin a ni.
HRINGNUN HI tih Lehkhabu hi tunhnai lawk khan a rawn ti chhuak dawn tih Lunglei atangin min rawn hrilh a, MAL Sub Headquarters Lunglei a member tangkai tak a ni a, Lunglei kan zin chang pawh a min lo khualchhawntu fel tak tak zinga mi a ni.
Article a ziah hnem tawh teh reng nen a lehkhabu vawi khat tih chhuahna a ni awm e.Amah hi lehkha chhiar mi a nih ang bawkin ziakmi a ni tel bawk a, a kutchhuakte hi chhiar a nuam a, Mizo tawng a hmang dikin spelling a duh uluk hle a, tawngkam ulh leh un tak tak a hman ngai loh avangte hian a lehkha ziakte hi chhiar a nuam a, tawi fel takin a ziah thiam avangin, hahdam takin a chhiar theih a ni.
Chanchinbu a Article a ziahte hi a bengvarthlak mai bakah ram veitu a nihna a lan thin avangte hian tute tan emaw chuan ngaimawh lai tur pawh alo awm mai thei a, Amaherawh chu tuna a lehkhabu-ah hi chuan Hringnun chanchin a tawn thin pangngai a ziah avangin tawngkam hriam lek lek chhiar tur a awm lova, ngaihnawm takin hringnun hi min thlir pui a, fiah takin min hmuh tir avangin hringnun hi tha zawka kan hman thiam nan he lehkhabu hmangin min kaihruai thiam hle mai.
He Lehkhabu hi phek 112 thleng a awm a, a hmalama a thuhmahruai ziah leh a bu chhuahsaktu publisher MCL publication neitu MC Lalthianghlima thuhma nen chuan phek 120 lai a ni .
Hringnun hi a ti tak nan, a mimal chanchin lam hawi a ni deuh reuh a, khawvel milar Britain Primer thin Churchilla chanchinte , Zoram politics lamte pawh a rawn ziakin thil chi hrang hrang a ziak a, thil chi hrang hrang a ziahte hi Book of the year vawi 2 dawngtu Lalhruaitluanga Chawngte lehkhabu style in a chhunga thuawmte chu :-
Hringnun hi-1,
Hringnun hi-2,
Hringnun hi-3,
Hringnun hi-4, etc tiin
Hringnun hi-31
thlengin a rawn ziak tlar thluah a, Pu PL Liandinga sawi dan takah a chhung thu awmte zawnawlna atang ringawt chuan chhiar vek a ti chak awm lem lo a ni.
Amaherawh chu a chhung thute hi hlawm 31 in a rawn then tak te hi tawifel takin hringnun awmzia phek hnih, phek thum lek lekin a rawn tar lang a, kan chhiar dawn chauh emaw kan tih laiin a tawp ta mai a, hlawm khat te te hi thui deuh hleka ziak a tum lo hrim hrim a , thupui 31 a rawn dah chu thil chi hrang hrang, inkarki tak takte ziakin ama mimal tawnhriatte a rawn dah la, chhiar tui laklawh avangin kar lovah kan chhiar zo vat mai a ni.
Amah hi thu leh hla lamah a tui a, a irawm chhuak thuziak a nih avangin reference hranpa a awm lem lova, a sawi tum a chian avangin chhiar a nuam a, a bengvarthlak piah lamah chhiar tui a awl hle a ni.
A bu chhungah hian thurchhuah tur a tam hle a, sawi tawh angin he lehkhabu hi a chhah lem lo viau nain a chhunga thu awmte hi a tha hlawm viau thung a, khawi hmunah pawh chhiar ila rem vek thei turin kil hrang hrang a ziak a, a hawl zau viau a ni.
Kohhran rawngbawltute,
Ram hruaitute, zirlai te, hnathawk tawh thalaite ngei pawhin tui taka an chhiar theih turin “Hringnun hi” a rawn ziak kim a, lehkhabu khawr pum tawh thuziakmite tan ngei pawh he lehkhabu hi chhiar hmaih chi a ni hauh lo ang.Hringnun chanchin a nih ang ngeiin he lehkhabu hian ramri a nei meuh lo a, a hawl zau hle a ni.
Bung tina a tarlan Hringnun thawnthu hi sawi belh chakawm khawpin a ziak tawi thiam a, chiang tak leh fiah taka a ziah thiamna hian he lehkhabu hi zofate tana lehkhabu ro tling takah a hlankai phah ngei pawh a rinawm.
Mizoram leh a chhunga cheng zofate tan chauh ni loin Zoram khawvela cheng zawng zawng in a thinlung chhungril ber atanga ruahtham loh thu tha tak tak a rawn sawrchhuahte hi lo chhiar hmaih hauh lo turin ka duh sak a che u.
Chhiar la, khup mai loin chhiar leh thin turin ka duh che a ni. Hringnun hi vulreng turin siamtu in a duang lova, chul thei tura duan a ni bawk tih a sawi ngun hle.kan pian ni atanga kan thih ni thlengin hun hlimawm tak takte, hun harsa tak tak te kan pal tlang thin a,harsat manganna kan tawh pawhin buai mai loin hun hian a liam pui mai dawn tih hi kan hriat atan min hrilh bawk a ni.
Mahmuaka Chhakchhuak thuziah atang hian bungtinah thil chi hrang hrang a hmuhte chuan zawhna a zawt a, a chhanna tur a dah zel bawk.
Entirnan, mangan tawp thil hi kan tawh changin rilru buai leh phili loin chhum thim chhah takin min bawm reng mahsela, vana kan Pathian hnenah tluk luhna chang hre turin harhfima awm turin min fuih bawk a ni.
Hetianga zofa zawng zawngte tana hmangaihna luangchhuak thu tha Hringnun hi tih lehkhabu chhiar tur a awm hi ka lawm hle mai.