Naupai hi mi thenkhat tan chuan awlsam angreng tak a nih laiin, thenkhat tan erawh a thla tel emaw kum tam tak meuh hun a duh thin. Hriat theih dan awlsam leh mawlmang berah chuan, nang leh i kawppui khan invenna tel lova kum khat chhung nupa nun (sex) in hmang chung pawha nau i la pai lo fo a nih chuan thil fel lo leh dik tâwk lo a awm a ni thei a, in entir vat tur a ni ang.
Kum 35 chunglam i nih erawh chuan kum khat dang nghah chi a ni hauh lova, kum a tam poh leh naupai theihna ‘chance’ pawh hi a hniam ve duak duak tih hriat a tha. Chuvang chuan, naupai tumna a awmin emaw nupa anga pawm tlanna a awm tawh chuan a hmalama doctor rawn a tha ber a ni.
Naupai tur hian engtia rei nge ngai reng reng le?
A hun chungchangah chuan nupa azirin a danglamin a in-ang lo viau thei. A then chu invenna tel lova nupa nun vawikhat an hman mai kha a tâwk laiin, thenkhat ve thung tan chuan a thla tel tak meuh te pawh a ngai.
Mipa chi in hmeichhe tui va pawh tur hian zinkawng hautak leh harsa ve angreng tak a paltlang a, case thenkhatah chuan chi leh tui hi awlsam takin an intawng mai bawk a, case dangah erawh an intawng fuh hlei thei lo.
Mipa chi tihchhuah a nih atangin hmeichhe chhulah ni 5 chhung a dam thei a, chuvang chuan tui chhuah hun (ovluation) thlen hmâ ni reilotea invenna tel lova nupa nun hman khan chi tan paw’n tui lo chhuah hun nghah khiau mai kha remchang tak a ni.
A tlangpui chuan, nupa tam zawk hi kum khatnaah nau an pai deuh mai thin a, kum hnih chhung hian a tam zawk hi an hlawhtling. A lo rei deuh ta a nih pawhin naupai lama harsatna i nei, tihna erawh a ni hauh lo tih hria ang che.
Nupa thenkhat hi an chi leh tui a chak ve hrim hrim a, hei vang hian eng emaw thla (month) bika naupai mai hi an awlsam hle. Thla tam liam hmâ in, an pai nghal deuh mai thin a. Nupa thenkhat erawh a thla bi anga naupai theihna ‘chance’ an nei chau ve hle thung a ni.
Kum
Naupai chungchang a rik tawh chuan kum hian kawng-ro a su in, awmzia a nei hle. Kum 20 chho velah hian hmeichhiate hian naupai theihna an nei tha in, hun remchang tak an tan hawnsak a ni thin. Kum 30 ral kai tawh chinah erawh a hniam thla ta a, kum 40 ral kai tawh phei chuan hniam tak a ni tawh.
Engpawhnise, Polycyystic ovary sundrome (PCOS) vanga harsatna hian naupai theihna kawng a tiphui thei tlat mai a, sawi tawh angin naupai tumna a awm tawh chuan nupa hriselna dinhmun hriatchian a, Doctor thiam thurawn lak a pawimawhin, a tul hle reng a ni.
Enngvangin nge naupai tura hun a duh rei viau le?
Naute siamna kawngah harsatna i nei a ni thei.
I kum, ei leh in, hna leh nunphung/khawsak phung.
Rit lutuk emaw thau ‘over’ te, rihna hniam viau te.
Natna benvawn eng emaw ber vang te.
Nupa nun hman hun (timing) chungchangah te.
Hengte hi uluk taka enfiah a, zirchian tur a ni a. I dinhmun hrechiangtu ber i ni a, naupai theih hun remchang inhawn lai te hriatchian a, nupaa inpawh taka kalpui tur a ni ang.