China-a COVID-19 vanga inkhuahkhirhna khauh tak kalpui duh lohna lantir chuan ni thum tling tawhin khawpui lian a kang kai zau sawt hle a. Shanghai-ah chuan mipui leh police pawh nasa takin an innawr.
Tun tuma mipui lungawi lohna hi President Xi Jinping-a’n kum 10 kal taa thuneihna a chan atanga a vawi khatna a ni a. Khawthlang lama Xinjiang region khawpui, Urumqi-a in kanga mi 10 an thih atanga intan niin mi an thih chhan hi inkharkhip a nih avanga chet zung zung a rem loh vangah mipuiin an puh.
Thihna thleng hian Wuhan-a hri hmuh tan a nih hnu kum thumah pawh Beijing-in zero-COVID policy kalpuia inkharkhip, endik runpui leh hri kai nena inhnamhnawihte chhui vak vak a la kalpui reng duh lohna a irh chhuahtir ta a ni.
“Ka ram ka hmangaih avangin hetah hian ka la awm a; mahse, kan sorkar erawh ka hmangaih lo. Zalen taka chhuah ka duh a, ka thei si lo. Kan COVID-19 policy hman hi game a ni a, science leh a tak tak behchhana tih a awm lo,” tiin lungawi lo pakhat, Shaun Xiao chuan Reuters news agency hnenah China-a khawpui lian ber, Shanghai-ah a sawi.
Pathianni zan khan Shanghai-ah hian mi za tel pungkhawmin ziak loh puan an keng a, hei hi an ramin censorship a kalpui nasa lutuk an entirna a ni a. Urumqi hming put chhan, Wulumuqi Road-ah police tam tak duty-in Inrinni zan khan kang hlumte hriat rengna hun an hmang a, hei hi lungawi lohna lantirin a zui ta a ni.
Reuters chuan police-ten an bus-ah mi eng emaw zat an khalh luh thu leh mipui zing atanga an phurh sawn thu a tar lang a. BBC chuan an reporter pakhat, lungawi lohna lantirna thla leh thuthar latu chu darkar eng emaw zat hran a ni tih an sawi bawk.
“BBC chuan kan journalist Ed Lawrence-a chunga thil thleng hi kan ngaihven hle a, Shanghai-a lungawi lohna lantirnaa hna a thawk chu man niin a kut phuar (handcuff) a ni,” tiin an thupuangtu chuan thu a chhuah.
“Darkar eng emaw zat hren a nih hnuah chhuah a ni a. Man a nih chhung hian police-in vuain an pet bawk,” a ti.