Aizawl : PC party President Vanlalruata’n Mizorama sumdawnna virvel dan sawiin, “Kan duh leh tum vang pawh ni lo, kan dodal chung pawhin kan ram paltlangin sumdawnna lian pui pui a kal ṭan a. Hei hi awmze neia dan dik tak hnuaia mipui hlawkpui ngei tura kalpui turin special economic zone a siam theih a ni” a ti.
Nimina PC party pisa-a policy sawihona he thu hi PC party President chuan a sawi a. PC party-in Mizorama special economic zone siam a tum thu te, Mizorama kawngpui leh rel kawng awm dan leh siam tum mek te, Mizoram chhehvela kawngpui lian leh lawng chawlhhmun awm dan leh Mizoram aṭanga pawh theih dan te, thlawhna ṭum hmun awm dan te sawiin, keng te ena Mizoram chu India, Burma leh Bangladesh insumdawntawnna hmunpui, Asia chhim chhak ram zawng zawng tana insumdawntawnna hmunpui pakhata siam theih a nih thu te a sawi a. “Hei hi kan ram tana dinchhuahna tur kawng awlsam ber zing ami a nih avangin kan party Economic Policy-ah pawh ‘Indo-Myanmar- Bangladesh (with ASEAN) Trade Hub- a insiam’ tiin kan dah” a ti bawk.