Aizawl: Kum 1872-a din, Mizorama damdawi in upa bera ngaih, Tlabunga Sub-Divisional Hospital-in kum 150 a tlin champha chu nimin khan lawm a ni.
A lawmna inkhawm, damdawi in tuala neih hi Tlabung Senior Medical Officer Dr. V Lalremruata’n a kaihruai a, Tlabung damdawi inin kum 150 a tlin champhâ lawmna leh hriatrengna lung phun chu khuallian, Health Services Director Dr. Lalzepuii’n a hawng.
Dr. Lalzepuii chuan, Mizorama damdawi in upa ber Tlabung damdawiin inin kum 150 hmel a hmu ta chu Mizoram pum tan hun chhinchhiahtlak leh ni lawmawm bik a ni tih a sawi a, Tlabunga Health department-a thawkte inpekna leh thawhrimna chu an hriatpui reng thu leh, Tlabung damdawi in chu cheng nuai 500 chuang senga sak that thuai tum a nih thu te, Tlabung main centre hnuaia khaw 6-ah Health Clinic hawn tum a nih thu te a sawi.
Tlabung damdawiin kum 150 tlin awmna hun hi Health Services Director bakah, Lungleia Health department hotute leh, Tlabunga khawtlang huap pawl hrang hrang hruaituten an hmanpui.