Aizawl : Lunglei High Powered Committee (HPC) fund Rs. nuai 13.86 senga dawh Kau Luia suspension bridge, Saithah Zau panna chu nimin khan Lunglei HPC Vice Chairman Lawmcawma Tochhawng-in a hawng.
HPC Vice Chairman chuan Zawlpui leh a chhehvel khaw mipuite mamawh Kau Lui Suspension Bridge HPC Lunglei kaltlanga tihhlawhtlin a ni ta chu lawmawm a tih thu sawiin, tangkai taka hman ngei a nih theihna turin mipuite duhsakna a hlan.
Lawmawma Tochhawng chuan HPC Lunglei thil tum pawimawh ber chu ei leh bara intodelha, phai lam atanga lakluh tih hniam a nih thu a sawi a. Kau Lui Suspension Bridge chu hemi kawnga hmanraw pawimawh tak a la nih ngei a beisei thu a sawi.
Zawlpui chu Lunglei district-a khaw taima leh thlai thar hnem, Lunglei bazar chawm bertu an nih thu sawiin, taima taka hmalak chhunzawm zel tur leh an khuaa hmasawnna ruhrel thar awm chu uluk leh fimkhur taka enkawl turin HPC Vice Chairman chuan a chah a. Kuthnathawktute hmasawnna turin HPC Lunglei chuan theihtawp chhuah zel a tum tih sawiin, hmasawnna tura an mamawhte HPC ah thlen hreh lo turin a chah bawk.
Sorkar thuchhuahin a tarlan danin Kau Lui Suspension Bridge chu HPC Lunglei fund che- ng nuai 13.86 senga sak niin, lei thui zawng feet 420 leh a vang feet 4 a ni a, Departmental a hnathawh a ni.
He lei, Saithah Zau panna hi Zawlpui kuthnathawktute tana pawimawh niin, helaia lei hmasa hi kum 2017 khan tuilianin a tichhia a. Saithah Zau ah hian kuthnathawktu thahnem takin hma an lak bakah Tuisen leh Bolia nena inkalpawhna pawimawh a ni bawk a ni.