China hruaitu hlui, Tiananmen Square-a an ram mipuiin mipui sorkar duhna nasa taka an lantirna thlen hnua an ram hruaitu, Jiang Zemin-a chu kum 96 mi niin a thi.
An ram sorkar chanchinbu chuan an ram huna Nilaini chhun dar 12:00 (India-a zing dar 9:30) pelh hnu hretah Shanghai-ah a thi tih an puang.
Jiang-a hunah hian China ram hi inhawng zauvin an ram pawh nasa takin a thang.
A thih hun hi China-in Tiananmen-a duh lohna lantirna an tawn hnua hetianga mipui thinrim nasat leh ber tum a tawn lai niin Covid inkhuahkhirhna duh tawh lo mipui an inhawr khawm nasa.
Chinese Communist Party chuan Jiang-a hi leukaemia leh a taksa peng thenkhat hna thawk tawh lo vanga thi niin an sawi.
‘Hruaitu tha bik leh hmathlir nei tha’ tia sawiin ‘Communist fighter tual chhel, fiah dawl’ niin an sawi bawk.
Sorkar hnuaia awm chanchinbu, Global Times leh Xinhua news agency te chuan amah sun nan an website-te chu a dum leh var chauhvin an lantir.
Jiang-a hi kum 1989-a an ram mipuiin mipui rorelna phuta Beijing-a Tiananmen Square leh a chhehvela communist sorkar nasa taka an nawrna leh sorkarin tharum nena a chhan let hnua an ram hruaitu a ni.
He thil thleng hian Communist Party hruaitute zingah firfiaka taka kal duh leh insiam that duh inkarah inhnialna pawh a siam nasa.
Party chhunga inlungrual lohna chuan sorkar hna thawk thin, Jiang-a hi an ram hruaitu tan a siam phah ta a. Na taka kal zel duhtu leh thianzau duhtute inkara inremna siam thei tura beiseia dah a ni.
A kaihhruaina hnuaiah hian eibar dinhmun chawisanna an uar a, Communist-ten a thuneihna tam tak thunun mah se China chu khawvela ram thiltithei zingah a hung chhuak a ni.
Kum 1997-a British sorkarin an hnena Hong Kong a hlan let leh kum 2001-a World Trade Organization-a China a tel ve tan leh hei vanga khawvel huap economy-a an lansarh zui dan pawh a kaihhruaina hnuaia tih a ni.
An ram dinhmun chawisang hle mah se an politics kalphung siam that a tumna chuan party chhungah amah ngaithei lo a siam ve tho va, Taiwan laka a chet duh dante chu nem lutuk tia sawisel an awm a. Kum 1999-a sakhaw pawl pakhat, Falun Gong laka chetna rawng tak takte chu ani chuan tha a ti lo va, Communist Party tan pawha hlauhawm a nih thu a sawi a; mahse, a dal thei lo.
Communist Party-a hruaitu nih zui zel tum pawhin a bei nasa a, ama political ideology, Three Represents theory a tih hmangin an party chu tihtunlai a tum nasa hle.
Thuneihna a chan lai hian Jiang-a hian US nena an inkar pawh siam that a tum hle a, vawi tam tak tlawhin President George W Bush-a huna 9/11 attacks hnua Washington-in ‘war on terror’ a kalpuiah pawh a thawhpui tha hle nghe nghe.
Ram dang mi tel lova vui tur
Jiang-a hi engtikah nge vui a nih dawn sawi chian a la awm lo va; mahse, a vui inkhawmah hian ram dang sorkar aiawh leh hruaitu sawm an ni dawn lo.
Amah thlaka president ni zui ta, Hu Jintao-a chu a tel dawn tih sorkar chanchinbu, Glabal Times chuan a tar lang a. Ani hi thla hmasaa CCP conference atanga lak chhuah kha a ni nghe nghe.
Hu Jintai thlaktu, tuna president ni mek, Xi Jinping-a pawh a vuinaah a tel dawn tih Global Times chuan a tar lang bawk.
Chanchinbuin sorkar thu a tihchhuahah hian ram dang hruaitu emaw, ram dang sorkar aiawh emaw mi dang sawm an ni dawn lo tih a tar lang.
Funeral committee chuan Jiang-a vuina hi ‘an ram tih dan’ angin an ti mai a, sorkar inrawlh leh mi sawm khawm chiam an ti dawn lo a nih hmel.